Qostanaı oblysynda sharýanyń 40 tonna shóbi órtenip ketti
QOSTANAI. QazAqparat - Naýyrzym aýdanynyń Razdolnoe aýylynda sharýanyń qysqa daıyndaǵan mal azyǵy órtenip ketti, dep habarlaıdy QazAqparat tilshisi.
Aýyldaǵy Stroıtelnaıa kóshesiniń boıyndaǵy úıde qazirdiń ózinde 40 tonna shóp janyp ketti. Bul týraly aýyl turǵyny Samat Janpeıisov habarlady.
Aqparatty oblystyq TJD órt sóndirý bólimi rastady. Naýyrzym aýdanyndaǵy órt týraly kezekshi bólim 31 qazan kúni saǵat 02:35-te habar alǵan.
«Órt aýmaǵy 120 sharshy metrden asady. Tilsiz jaýdy aýyzdyqtaý qıynǵa soǵyp tur. Shóp alqaby úılerge jaqyn ornalasqan. Órt sóndirýshiler jaqyn jerdegi qurylys materıaldaryn oqshaýlady. Qurǵaq shóp tez janǵysh, onyń ústine jeldiń kúshtiligi de kedergi keltirýde», - dep málim etti oblystyq TJD baspasóz qyzmetindegiler.
Aldyn ala boljam boıynsha áldebireý shóp alqabyn qasaqana órtegen. Eń jaqyn ózen 1 shaqyrym qashyqtyqta ornalasqan. Sýdy jyldam jetkizý de qıyndap tur. Órtti sóndirý úshin 8 adam men 2 arnaıy tehnıka jumyldyryldy.
Illıýstratsııalyq foto
