Qostanaı oblysynda shaǵyn qalalardy damytýdyń baǵdarlamasy jasaldy
QOSTANAI. QazAqparat – 2020 jyly Eurasian Resources Group (ERG) kompanııasy Qostanaı oblysynda áleýmettik mańyzdy jobalardy júzege asyrýǵa 3,1 mlrd teńge bólmek.
Búgin oblys ákimi Arhımed Muhambetov pen atalmysh kompanııanyń Bas atqarýshy dırektorynyń birinshi orynbasary Aldııar Qaztaev áriptestik týraly memorandýmǵa qol qoıdy, dep habarlaıdy QazAqparat.
Bul memorandým sheńberinde aımaqtardy damytýdyń úsh jyldyq baǵdarlamasy jasalyp otyr. Jobany QR Úkimeti maquldady. Aımaqta áleýmettik mańyzy joǵary jobalardy júzege asyrýǵa 3 mlrd 117 mln teńge bólinedi. Qarajattyń basym bóligi Rýdnyı qalasy men Qashar kentiniń jylý jelilerin kúrdeli jóndeýge jumsalmaq. Ári osy óńirlerdiń tutynýshylaryn elektr qýatymen arzandatylǵan baǵamen qamtamasyz etýge baǵyttalady.
«Elbasy Nursultan Nazarbaev aımaqtardy damytýdy qazirgi tańdaǵy eń negizgi mindetterdiń biri dep atap ótti. Osy oraıda men ákimdiktermen arada jasalǵan memorandýmdardyń árqsaısysy – atalǵan tapsyrmany oryndaý men turaqty qoǵam qalystastyrý qamy dep batyl aıta alamyn. Biz tapqan árbir teńgeniń týǵan jerdiń damýyna, turǵyndardyń ıgiligine jumsalýyna múddelimiz»,- dedi ERG Dırektorlary keńesiniń tóraǵasy Aleksandr Mashkevıch.
Oblys ákimi Arhımed Muhambetovtiń aıtýynsha, bul qarjyǵa Arqalyqta mektep, Rýdnyı men Lısakovsk qalalary, Qashar men Oktıabrskıı kentterinde joldar jóndeledi. Rýdnyı men Qashar arasyndaǵy kúre jol qalypqa kelip, jedel járdem mashınalary satyp alynady. Budan bólek Qashar kentindegi saýyqtyrý ortalyǵyn kúrdeli jódeýden ótkizý kózdelgen.
«Rýdnyı qalasynda eki jyly aıaldama ornatylady. Ortalyqtaǵy «Dostyq» saıabaǵynda «ERG-Djýmandjı» atty jańa arqan saıabaǵy salynbaq. Qyzmetkerler bastamasymen Jeńis kúni qarsańynda Arqalyqtyń qalalyq saıabaǵyndaǵy eskertkish obelısk jańǵyrtylyp, otbasylar tynyǵatyn jańa saıabaq ta ashylady. Rýdnyı men Lısakovsk qalalarynyń ortalyq kóshelerine kólikterdiń jyldamdyǵyn anyqtaıtyn elektrondy tablolar ornatylyp, qaýipsizdikti qamtamasyz etýge sep bolmaq», - dedi oblys basshysy.
