Qostanaı oblysynda sanavıatsııa dárigerleri jas qyzdyń ómirin qutqaryp qaldy
ASTANA. QazAqparat - Qostanaı oblysynda sanıtarlyq avıatsııa dárigerleri 15 jasar qyzdyń ómirin qutqaryp qaldy, dep habarlaıdy alau.kz .
Qostanaı oblystyq balalar aýrýhanasynyń hırýrgııa bóliminiń meńgerýshisi Igor Belobrjıtskıı habarlaǵandaı, 3 naýryz kúni Denısov aýdanyndaǵy mektep oqýshysyna shuǵyl operatsııa qajet ekendigi týraly dabyl kelip túsken. Oblystyq balalar jáne eresekter aýrýhanasynyń dárigerleri jedel túrde sanavıatsııamen balaǵa jetken. Dárigerler ózderimen birge 10 lıtr qan alyp kelgen.
«Jyldam kiristik. Barlyǵymyz jedel jınalyp, qandy alyp, ushaqqa otyrdyq. Atalǵan jerge ushyp keldik, ol jerde TJ qyzmetkerleri boldy. Jol polıtseıleri qozǵalysty shektegen eken. Jergilikti dárigerler jumys jasap jatty. Tez arada iske kirisip kettik. Balanyń uıqy beziniń isigi jarylýy saldarynan qan ketken. Qyz 3,5 lıtr qan joǵaltqan», - dedi Igor Belobrjıtskıı.
Oblys ortalyǵynyń dárigerleri otany sátti ótkizdi. Qazirgi tańda qyzdyń jaǵdaıy jaqsy. Ol jergilikti dárigerlerdiń baqylaýynda aýrýhanada qaldy. Qostanaı oblystyq balalar aýrýhanasynyń dárigerleri aýdandyq dárigerlermen baılanysyp otyr.
