Qostanaı oblysynda reseılik 184 ret jol erejesin buzǵan

QOSTANAI.QazAqparat – Qostanaıda jol erejesin óreskel buzyp, qoldan jasalǵan saqtandyrý polısimen kólik júrgizgen Reseı azamaty ustaldy. Tártip buzýshynyń kóligi aıyp turaǵyna qoıyldy, dep habarlaıdy QazAqparat oblystyq polıtsııa departamentiniń baspasóz qyzmetine silteme jasap.

Tártip buzýshy 2021 jyldyń 10 aqpanynda ustaldy. Patrýldik polıtsııa qyzmetkerleri Arman Bektursynov pen Ádil Jaqypov Reseı Federatsııasynyń 29 jastaǵy azamaty mingen «FORD Gelaksı» markaly avtokóligin toqtatady. Avtomatty tirkeý quraldarynyń kómegimen 2020 jylǵy 20 maýsym men 2021 jylǵy 10 aqpan aralyǵynda atalmysh kólik ıesiniń 184 ret jol erejesin buzǵany anyqtaldy. Aıyppul kólemi 3,5 mln teńgeden asyp ketken.

«Júrgizýshi jalǵan saqtandyrý polısimen kólik quralyn basqarǵan. Avtokólik Qostanaı qalasy ákimdiginiń mamandandyrylǵan turaǵyna ornalastyryldy, quqyq buzýshyǵa salynǵan aıyppuldardy tóleý qajettiligi týraly habarlama berildi. Júrgizýshi QR ÁQBtK-niń 230-baby boıynsha ákimshilik jaýapkershilikke tartyldy, jalǵan saqtandyrý polısin paıdalanǵany úshin materıal jınaldy», delingen polıtsııa aqparatynda.

2021 jyldyń qańtarynda «Avtoýragan» qurylǵysy arqyly shetel kólikterine qatysty 1676 ereje buzý deregi tirkelgen. Aıyppul somasy – 10 mln 209 myń teńge. Qazir kólik ıelerine 700 nusqama jiberildi.