Qostanaı oblysynda Reseıge shyǵatyn joldar jabyldy
QOSTANAI. QazAqparat - Búgin Qostanaı oblysynyń Reseı Federatsııasyna shyǵatyn joldary jabyldy, dep habarlaıdy QazAqparat tilshisi.
«Denısov-Myqtykól-Jitiqara baǵyttarynyń RF-ǵa shyǵatyn joldary jabyldy. Qazirgi ýaqytta boran soǵyp, jeldiń jyldamdyǵy 23 m/s jetti»,- dedi Jitiqara aýdandyq TJ bóliminiń bastyǵy Aslanbek Temirov agenttik tilshisine.
Oblystyq TJD baspasóz qyzmetiniń málimetinshe, búgin Naýyrzym aýdanynda 3 avtokólik qar qursaýynan shyǵaryldy. Oqıǵa «Qarameńdi-Óleńdi» tasjolynyń 12-shi shaqyrymynda bolǵan. Barlyǵy 9 adam evakýatsııalandy. Qutqarýshylar olardy Qarameńdi aýylyna jetkizdi.
Qazgıdromettiń boljamynsha Qostanaı oblysynda jel ekpini sekýndyna 23-24 metrge deıin jetedi. Sondaı-aq, keıbir aýdanda kóktaıǵaq bolyp, boran soǵady. Sol sebepti, sınoptıkter jolǵa shyqqan qostanaılyqtarǵa barynsha saq bolýdy eskertedi.
