Qostanaı oblysynda psıhologııalyq qoldaý ortalyǵy ashyldy
QOSTANAI. QazAqparat - Qostanaıda elimizde balamasy joq psıhologııalyq jáne qosymsha bilim berý óńirlik ortalyǵy ashyldy,dep habarlaıdy QazAqparat.
Búgin oblystyq bilim basqarmasynyń basshysy Qusaıyn Kátkenov tilshilerdi ortalyqtyń jumys barysymen tanystyrdy. Bul jobanyń júzege asyrylýyna oblys bıýdjetinen 54 mln teńge bólingen. Ortalyq basshysy Elena Petrenkonyń aıtýynsha, qosymsha bilim berýdi damytý ortalyǵy elimiz boıynsha tuńǵysh ret ashylyp otyr.
«Basty maqsatymyz - balalar úshin psıhologııalyq kómektiń qoljetimdiligin, sapasyn arttyrý, sondaı-aq psıholog mamandarynyń kásibı quzyrettiligin damytý. Qazir biz jas óskinge psıhologııalyq keńes berýden tys, áskerı-patrıottyq, kórkem-estetıkalyq, áleýmettik baǵyttar boıynsha da jumys isteımiz. Bul rette Astana, Almaty jáne Reseıdiń Sankt-Peterbýrg, Chelıabi qalalaryndaǵy ozyq tájirıbelerdi negizge alyp otyrmyz», - deıdi ol.
Ortalyqtyń mamandary ádistemelik keńes berý, semınar-trenıng, koýchıngter ótkizedi. Bala men ata-ananyń arasyndaǵy máselelerdi sheshý úshin arnaıy bólim de qurylǵan.
«Bizdiń ujym endi jınaqtalyp jatyr. Psıhologtar arnaıy oqý kýrstarynan ótedi. Ortalyqqa tájirıbeli mamandardy shaqyrttyq. Búginde sýıtsıdpen kúres kún tártibinen túspeı tur. Byltyr oblys boıynsha ózine-ózi qol jumsaý áreketteriniń 50 faktisi tirkeldi. Ókinishke qaraı, onyń 12-si qaıǵyly aıaqtaldy. Mine, bizdiń ortalyq osy máselemen kúresýdi kúsheıtetin bolady», - dedi oblystyq bilim basqarmasynyń psıhologııa bóliminiń basshysy Ásem Qulmaǵambetova.
Psıhologııalyq qoldaý ortalyǵynda táýlik boıy 37-08-58 senim telefony jumys isteıtinin aıta keteıik. Onda mamandar balalar men ata-analarǵa keńes beredi.
