Qostanaı oblysynda provızorlyq statsıonardyń jumysy toqtatyldy
QOSTANAI.QazAqparat – Qostanaı aýdanynyń ortalyq aýrýhanasy bazasyndaǵy provızorlyq statsıonar jabyldy, dep habarlaıdy QazAqparat.
Oblystyq densaýlyq saqtaý basqarmasynyń málimetine súıensek, búgin Qostanaı aýdanyndaǵy provızorlyq emhanadan sońǵy naýqastar shyǵaryldy.
«Epıdemıologııalyq jaǵdaıdyń jaqsarýyna baılanysty aýrýhana basshylyǵy provızorlyq statsıonardyń jabylǵanyn jarııalady. Perzenthana jáne hırýrgııalyq bólimsheler bazasynda dezınfektsııalyq óńdeý júrgiziledi. Jaqyn arada shuǵyl jáne josparly akýsherlik-gınekologııalyq jáne hırýrgııalyq beıindegi patsıentterdi qabyldaý jáne emdeý qaıta bastalady. Basqa da naýqastady qabyldaý qalypty formatta jalǵasady», - deıdi oblystyq densaýlyq saqtaý basqarmasynyń baspasóz hatshysy Ksenııa Jılkıbaeva.
Buǵan deıin óńirde koronavırýs indeti men pnevmonııa juqtyrǵan naýqastar sanynyń azaıýyna baılanysty 2 provızorlyq ortalyqtyń jumysyn toqtatqany habarlandy.
