Qostanaı oblysynda poıyz jolaýshysynyń 116 mln teńgesi urlandy
31 mamyr kúni «Qostanaı-Almaty» baǵytymen ketip bara jatqan poıyzdyń 22 jastaǵy jolaýshysynyń sómkesinde 116 900 000 teńge bolǵan. Oıynda bóten eshteńe joq jolaýshy keshkisin uıqyǵa jatyp, Jaqsy stantsııasyna kelgende oıanǵan. Ol poıyz qozǵalǵan kezde aqsha salynǵan sómkesin tappaı qalǵan jáne ol týraly birden polıtsııaǵa habarlaǵan.
Kóliktegi Polıtsııa departamenti bastyǵynyń orynbasary Nurjan Álibaevtyń sózinshe, qylmys jóninde habardy alysymen departamenttiń tájirıbeli qyzmetkerlerinen jedel tergeý toby qurylǵan.
Qylmyskerdi izdestirý barysynda temirjol kóliginiń barlyq nysandary, sonaı-aq jaqyn jerdegi eldimekender tekserildi. Poıyz qyzmetkerleriniń barlyǵynan jaýap alynyp, nátıjesinde qylmysty jasaýy yqtımal kúdiktiniń avtoportreti salyndy. 8 maýsym kúni Nur-Sultan qalalyq kólik polıtsııasynyń qyzmetkerleri qylmysty jasaýy múmkin degen úshi kúdiktini ustaıdy.
«Kúdiktilerdiń turyp jatqan jerine tintý júrgizilip, onyń barysynda 12 620 000 teńge men 198 500 AQSh dollary tabyldy. Aqshanyń bir bóligin kúdiktiler qylmys jasala salysymen eki kólik satyp alýǵa jaratyp úlgergen»,-dedi Nurjan Álibaev.
«Kúdiktiler tutqyndaldy. QR QK 188 baby, 4 tarmaǵy, 3 tarmaqshasy negizinde (Іri kólemde jasalǵan urlyq) sotqa deıingi tergeý júrgizilip jatyr. Sonymen qatar kúdiktilerdiń osy tektes ózge de qylmystarǵa qatystylyǵy tekserilip jatyr»,-dedi ol.
