Qostanaı oblysynda poıyz ben jeńil kólik soqtyǵysty

NUR-SULTAN. QazAqparat – Qostanaı oblysyndaǵy Prıtobolskaıa stantsııasynyń retteletin temir jol ótkelinde jol-kólik oqıǵasy boldy, dep habarlaıdy QazAqparat «Qazaqstan temir joly» AQ baspasóz qyzmetine silteme jasap.

«11 shilde saǵat 14:35-te Qostanaı oblysynyń Tobyl - Qusmuryn ýchaskesindegi Prıtobolskaıa stantsııasynyń retteletin temir jol ótkelinde jol-kólik oqıǵasy boldy. Kýágerlerdiń aıtýynsha, «Jıgýlı» markaly jeńil kólik júrgizýshisi toqtap turǵan avtolardy aınalyp ótip, temir jolǵa shyqqan. Bul kezde júk poıyzy kele jatqan. Apattan zardap shekkender bar. Oqıǵa ornynda polıtsııa jumys istep jatyr. Poıyz saǵatyna 57 km jyldamdyqpen júrip kele jatqan. Ótkeldegi belgi berý qurylǵysy durys jumys isteıdi», - delingen baspasóz málimdemesinde.

«Qazaqstan temir joly» UK» AQ-da oqıǵanyń sebepteri men mán-jaılaryn tekserý úshin komıssııa quryldy.