Qostanaı oblysynda poshta qyzmetkerinen 2,3 mln. teńge zeınetaqy qarjysyn qoldy qylǵandar ustaldy
QOSTANAI. QazAqparat - Rýdnyıda polıtseıler zeınetaqy taratyp jatqan poshta qyzmetkerine shabýyl jasaǵan 2 kúdiktini ustady. Bul týraly Qostanaı oblystyq ІІD baspasóz qyzmetinen habarlady.
«9 jeltoqsanda Rýdnyı qalasynda poshta qyzmetkerine shabýyl jasady degen kúdikpen 27 jáne 25 jastaǵy eki adam ustaldy, - delingen habarlamada. - Zeınetaqy tóleýge arnalǵan 2 mıllıon teńgeden astam urlanǵan aqsha tárkilendi».
3 jeltoqsanda qarııalardyń úıine zeınetaqy taratqan «Qazposhta» qyzmetkerine podezd ishinde belgisiz bireýler shabýyl jasady. Olar 2 mıllıon 360 myń teńge salynǵan sómkeni poshta qyzmetkerinen tartyp áketken.
«Sol kúni arnaıy tergeý toby qurylyp, ony Qostanaı oblystyq ІІD bastyǵynyń birinshi orynbasary polıtsııa polkovnıgi Atyǵaı Arystanov basqardy, - delingen habarlamada. - Polıtseıler tıisti sharalardy uıymdastyryp, kúdiktilerdi qolǵa túsirdi. Olardan urlanǵan aqsha tárkilendi».
Ustalǵandar kinásyn moıyndady. «Qazposhta» bólimshelerine qaýipsizdik sharalaryn saqtaý jónindegi nusqaýlar joldandy.
