Qostanaı oblysynda polıtsııanyń front-ofısteri ashyldy
Oblystyq polıtsııa departamenti baspasóz qyzmetiniń málimetinshe, «Azamattardy qabyldaý úshin» front-ofısteri jurtshylyqpen tikeleı baılanysta jumys isteıdi. Prezıdenttiń Joldaýyn júzege asyrý barysynda ashylǵan front-ofıstiń maqsaty - sybaılas jemqorlyqqa jol bermeý, azamattarǵa yńǵaıly qyzmet kórsetý, ótinishterdi qaraý merzimin qysqartý.
Keńse zamanǵa saı jabdyqtalyp, kompıýterler «Egov» elektrondyq úkimet portalyna qosylǵan. Sondaı-aq, munda bankomat, tólem termınaly ornatyldy.
Qazirgi ýaqytta front-ofıster oblystaǵy 13 qalalyq jáne aýdandyq polıtsııa bólimshesinde ornatylǵan. Jeltoqsan aıynyń sońyna deıin osyndaı taǵy 3 nysan salý josparda bar.
Front-ofıste halyqty jergilikti polıtsııa qyzmetiniń, ákimshilik polıtsııanyń bilikti mamandary, tergeýshiler qabyldaıdy. Sonymen qatar, munda 20-ǵa jýyq memleket qyzmet túri kórsetiledi.
Máselen, Rýdnyı qalasynyń Polıtsııa bólimine osy ýaqytqa deıin 1 myńnan astam adam keldi. Onda tapsyrylǵan ótinishterdiń negizi lıtsenzııalyq ruqsat alý júıesine, qylmystyq isterdi qaraý máselesine qatysty. Qostanaı oblysy PD Tyldyq qamtamasyz etý basqarmasynyń bastyǵy Anatolıı Chýıko aıtqandaı, mundaı qabyldaý bólmeleri turǵyndarmen baılanystyń ashyqtyǵyn qamtamasyz etýge septigin tıgizedi. Tártip saqshylarynyń zaman talabyna saı engizgen biregeı jobasy halyqtyń polıtsııaǵa degen senimin arttyrady.
Elbasy qazan aıyndaǵy Joldaýynda quqyq qorǵaý organdarynyń jumysyn túbegeıli ózgertýdi usyndy. Sondaı-aq halyqtyń polıtsııaǵa qatysty pikirin ózgertý qajettigin jetkizdi. Quqyq qorǵaýshy jazalaýshy emes, qıyn jaǵdaıda kómek beretin adam retinde óz abyroıyn kóterýi shart. Osy oraıda, Prezıdent quqyqqorǵaý salasyn reformalaýdyń naqty josparyn ázirleýdi tapsyrdy.
