Qostanaı oblysynda polıtsııa basshylarynyń qabyldaýyna 100-den astam adam keldi
QOSTANAI. QazAqparat - Qostanaı oblysynda polıtsııanyń front-keńselerinde azamattardy qabyldaý kúni ótti, dep habarlaıdy QazAqparat.
Óńirdegi barlyq bólimsheniń birinshi basshylary bas-aıaǵy 100-den astam azamatty qabyldady. Polıtsııa departamentiniń bastyǵy, general-maıor Beket Aımaǵambetovke Qostanaı qalasynyń 5 turǵyny júgindi. Solardyń biri - Rashel Mirjaqypova. Ol departament bastyǵyna jergilikti tártip saqshylarynyń qyzmetine shaǵymdanyp kelgen.
«Biz kómek surap kelemiz, qorǵan izdeımiz, al polıtseıler keı jaǵdaıda kerisinshe jumys isteıdi. Osy turǵyda qajetti sharalar qoldanylady dep senemin»,- dedi R. Mirjaqypova.
Óz kezeginde Beket Aımaǵambetov bul máseleni zerttep, óz isine nemquraıly qaraǵandardy jazalaýǵa ýáde etti.
Taǵy bir azamat Samat Kúzembaev Qostanaı aýdanynyń Maıalap aýylynan arnaıy kelgen. Ol joǵalǵan jylqylaryn basqa sharýa qojalyǵynyń qorasynan baıqaǵan. B.Aımaǵambetovtiń aıtýynsha, bul másele qylmystyq isti tergeý sheńberinde sheshiletin bolady. Al Qostanaı qalasynyń taǵy bir turǵyny Qyzǵaldaq Ómirzaqova qylmystyq isti tergeý boıynsha Qostanaı qalasy polıtsııa basqarmasynyń bastyǵy polıtsııa polkovnıgi Erbol Taıbekovke shaǵymdandy. Ótinish berýshini tyńdaǵan basshy qosymsha tergeý áreketterin júrgizý týraly sheshim shyǵardy.
Qostanaı aýdany polıtsııa bólimshesiniń bastyǵy Muhtar Jaılaýbekov bir saǵattyń ishinde 5 azamatty qabyldap, máselelerin sheshýge kómektesti. Belarýs eliniń azamaty Svetlana Krýtolevıch Qazaqstan aýmaǵyndaǵy ýaqytsha tirkeý suraǵy boıynsha júgindi. Onyń kópten beri sheshe almaı júrgen máselesin M.Jaılaýbekov tez arada rettep berdi.
«Men azamattardyń ótinishine polıtsııa bastyǵynyń jeke kirisip, qulaq asqanyn birinshi ret kórip otyrmyn. Meniń máselem dereý sheshildi. Mundaı qyzmetke dán rızamyn, el boıynsha qyzmet sapasy artyp kele jatqanyna qýanyshtymyn», -deıdi Svetlana Krýtolevıch.
Sarykól aýdandyq polıtsııa bóliminiń bastyǵy polıtsııa polkovnıgi Qaırat Ábdiqalyqovqa kóshi-qon zańnamasy, lıtsenzııalyq ruqsat berý júıesi máseleleri jáne QR ІІM-niń vedomstvolyq bilim oryndaryna oqýǵa túsý sharttary boıynsha aýdan ortalyǵynyń bes turǵyny júgindi. Máselen, Ózbekstan Respýblıkasynyń Tashkent qalasynyń týmasy Tımýr Ómirzaqov turǵylyqty meken-jaıyn rásimdeý máselesi boıynsha ótinish bildirdi. Budan ózge, Barvınov kentiniń turǵyny Oljas Qalıkeev B.Beısenov atyndaǵy QR ІІM Qaraǵandy akademııasyna oqýǵa túsý sharty boıynsha suraq qoıdy. PB bastyǵy Q. Ábdiqalyqov barlyq ótinishterge qatysty túsiniktemeler men keńester berdi.
Aıta keteıik, front-keńseler 2019-2021 jyldarǵa arnalǵan ishki ister organdaryn jańǵyrtý jónindegi Jol kartasyn iske asyrý sheńberinde ashyldy.
