Qostanaı oblysynda órttiń saldarynan kelgen shyǵyn 69 mln teńgeni qurady
QOSTANAI. QazAqparat - Búgin Óńirlik kommýnıkatsııalar ortalyǵynda oblystyq TJD basshysynyń orynbasary Azamat Orynbaev jylytý maýsymyna daıyndyq kezeńinde atqarylyp jatqan sharalar týraly aıtyp berdi, dep habarlaıdy QazAqparat.
Osy jyldyń 9 aıy ishinde oblysta 824 órt oqıǵasy tirkelgen, sonyń saldarynan 17 adam kóz jumdy. Órt oqıǵalary 69,1 mln teńgeden astam materıaldyq zalal keltirdi. Órt faktileriniń 65 paıyzy turǵyn úı sektorynda bolyp, tilsiz jaýdy aýyzdyqtaý kezinde 37 adam qutqaryldy. Ótken jyldyń sáıkes kezeńimen salystyrǵanda órttiń jáne ólim-jitim statıstıkasynyń kórsetkishi ózgermegen, biraq materıaldyq shyǵyn kólemi 6% -ǵa artqan.
«Tilsiz jaýdyń týyndaýyna kóbine ot jaǵý kezindegi salǵyrttyq, órt qaýipsizdigi erejelerin buzý jáne mas kúıinde shylym shegý basty sebep bolady. Sondaı-aq, jeke sektordaǵy úılerdegi peshterdi durys paıdalanbaýdyń saldary da órt oqıǵalarynyń bolýyna jáne ýlanýǵa ákep jatady. Peshterdi kásibı mamandardyń kómeginsiz ornatýdyń sońy da qaıǵyly jaǵdaılarǵa soqtyrady», - deıdi oblystyq TJD basshysynyń orynbasary Azamat Orynbaev.
Azamat Orynbaev TJD qys maýsymyna daıyn ekendigin jetkizdi. Jol-kólik quraldary saqadaı-saı, jabdyqtardyń sany jetkilikti.
Illıýstratsııalyq sýret
