Qostanaı oblysynda órtten zardap shekkenderge baspana salýǵa 2,3 mlrd teńge bólindi

NUR-SULTAN. QazAqparat – Qostanaı oblysynda órtten zardap shekken turǵyndarǵa úı salý úshin 2,3 mlrd teńge bólindi. Bul týraly QR Ulttyq ekonomıka mınıstri Álibek Qýantyrov aıtty, dep habarlaıdy QazAqparat tilshisi.

«Qazirgi ýaqytta Tótenshe jaǵdaılar mınıstrliginen birinshi bıýdjettik ótinim keldi. Osy bıýdjettik ótinimge sáıkes 2,3 mlrd teńge Úkimet rezervinen bólinedi. Bul nysanaly qarajat. Ol úı qurylysyna jumsalady. Búgingi esepteýlerge sáıkes, bul qarajat 91 úı salýǵa bólinip otyr. Ár úıge shaqqanda 25 mln teńgeden keledi», - dedi mınıstr Ortalyq kommýnıkatsııalar qyzmetindegi baspasóz máslıhatynda jýrnalısterdiń saýalyna oraı.

Onyń atap ótýinshe, úı salynatyn ár ýchaske 10 sotyqtan bolady. Úıdiń jalpy aýmaǵy 100 sharshy metrdi quraıdy.

«Bul qarajattyń ishinde ınfraqurylym da bar. Sýmen, elektr energııasymen qamtamasyz etip, jol salynatyn bolady», - dedi Álibek Qýantyrov.