Qostanaı oblysynda ortasha jalaqy 15,6 paıyzǵa ósti
QOSTANAI. QazAqparat – Óńir basshysy Arhımed Muhambetovtiń qatysýymen ótken keńeıtilgen otyrysta Qostanaı oblysynyń 2019 jylǵy áleýmettik-ekonomıkalyq damý qorytyndylary talqylandy, dep habarlaıdy QazAqparat.
Oblys ákimdiginiń ekonomıka jáne bıýdjetti josparlaý basqarmasynyń basshysy Gúlbaram Musaǵazınanyń aıtýynsha, óńirde shaǵyn jáne orta bıznestiń ósimi baıqalady.
«Oblysta shaǵyn jáne orta bıznespen aınalysatyn 52,5 myń kásipkerlik tirkelgen. Olardyń deni «Bıznestiń jol kartasy-2020» baǵdarlamasyn iske asyrýǵa qatysady. Osy maqsatta byltyr 2 mlrd teńgeden astam qarjy bólindi. Sonymen qatar jekeleı saýdanyń ósimi 4,5 paıyzǵa jetip, 345 mlrd teńge paıda túsirdi. 2019 jyly oblystyń shyǵyndary 99,7 paıyzǵa oryndaldy. Endi bıyl bıýdjette 313,9 mlrd teńge qarastyrylady», - dep málim etti basqarma basshysy.
Oblys ekonomıkasyndaǵy kórsetkishterdiń ósýi áleýmettik salada turaqtylyqty saqtaýǵa múmkindik berdi. 2019 jyly «Eńbek» baǵdarlamasy boıynsha 7,7 mıllıard teńge ıgerildi. Bul jumyssyzdyqty qysqartýǵa edáýir múmkindik bergen. Aımaqta 32 myń adam jumyspen qamtý sharalaryna tartyldy.
Ekonomıkalyq kórsetkishterdiń joǵary ósý qarqyny salyq túsimine oń áser etken. Nátıjesinde memlekettik bıýdjettiń kiris jospary 104,5%-ǵa asyra oryndaldy. Oblystyń ortasha aılyq jalaqysy 15,6%-ǵa ulǵaıyp, 140 309 teńgege jetti.
«2019 jyldyń ekonomıkalyq kórsetkishteri jaqsy. Ár salada ósim bar. Endi 2020 jyldyń josparyn tolyǵymen oryndaý mindeti tur. Osy maqsatta barlyq salalyq departamentte memlekettik baǵdarlamalardy keshendi túrde iske asyrýy tıis. 2020 jylǵa qoıylǵan maqsat – óńirlik jalpy ónimniń 4,1%-ǵa ósýine qol jetkizý», - dedi G.Musaǵazına baıandamasynda.
Oblys ákimi Arhımed Muhambetov kórsetkishterdiń jaqsy ekenin aıtyp, osy qarqyndy túsirmeýdi tapsyrdy.
