Qostanaı oblysynda órt sóndirýshiler jetispeıdi
QOSTANAI. QazAqparat - Oblystyq tótenshe jaǵdaılar departamentinde órt sóndirýshiler men órt sóndirý kólikterin basqaratyn júrgizýshilerdiń jetispeıtindigi aıtyldy, dep habarlaıdy QazAqparat tilshisi.
Osy kúni oblystyq tótenshe jaǵdaılar departamentinde 90-nan astam bos jumys orny bar. Qutqarýshylardyń qataryn tolyqtyrý úshin 63 birlik órt sóndirýshi, 28 birlik órt sóndirý kólikterin basqaratyn júrgizýshiler kerek. Kadr tapshylyǵyn sheshý úshin qyzmetke qabyldaý sharalary júrgizilýde.
«Qutqarýshy bolamyn deýshilerge qoıylatyn negizgi talap-sharttar da bar. Nıet bildirýshiler, birinshi kezekte, 45 suraqtan turatyn testileýden ótedi. Oladyń 21-i durys jaýap bolýy tıis. Sol sekildi, memlekettik tildi de jetik bilýleri tıis. Ony tekserý úshin taǵy 20 suraqtyq emtıhan tapsyrady», - dedi oblystyq TJD bastyǵy Talǵat Kákimov.
Sala mamandarynyń sózderinshe, kadr tapshylyǵy máselesin sheshý maqsatynda Otan aldynda óz boryshyn ótep kelgenderdi de qutqarýshylar qataryna qabyldaý jospary bar. Bıyl bizdiń óńirdiń 600-ge jýyq sarbazy úılerine oralady.
Taǵy bir aıta keterlik jaıt buryn órt sóndirýshiler jumysqa 18 ben 25 jas aralyǵynda ǵana qabyldanatyn bolsa, qazir 35 jasqa deıin qutqarýshylyq qyzmet atqarýǵa ruqsat berilgen.
