Qostanaı oblysynda orman órtine qarsy 33 mobıldi top quryldy
QOSTANAI. QazAqparat - Qostanaı oblysynda jyl basynan beri 5 orman órti tirkelgen. Bul týraly búgin oblystyq tótenshe jaǵdaılar departamentinde ótken baspasóz máslıhatynda atalǵan vedomstvo bastyǵynyń orynbasary Azamat Orymbaev málimdedi, dep habarlaıdy QazAqparat.
Aldyn alý jumystarynyń kúsheıtilgenine qaramastan, búgingi tańda aımaqta 1522 gektar aýmaqty quraıtyn 5 orman órti tirkelgen. Olardyń eń aýqymdysy - Qarabalyq aýdanynyń Mıhaılov orman mekemesi aýmaǵy. Onda 900 gektarǵa jýyq orman massıvi órtendi.
«Búgingi tańda órttiń shyǵý sebepteri men kelgen shyǵyndy jáne kinálilerdi anyqtaý maqsatynda arnaıy komıssııa quryldy. Jalpy, orman órtiniń shyǵyny 3,5 mln teńgeden asty. 12 sáýirden bastap óńirimizde órt qaýpiniń aldyn alýǵa 33 mobıldi top jumyldyrylǵan. Olardyń qatarynda azamattyq qorǵanys, jergilikti polıtsııa qyzmeti, orman mekemeleriniń jáne jergilikti atqarýshy organdardyń ókilderi bar. Qazirgi tańda departament oblystyq ákimdik bekitken jospar boıynsha memlekettik orman alqaptaryndaǵy órttiń aldyn alýǵa baǵyttalǵan birqatar sharalar ótkizýde», - dedi Azamat Orymbaev.
Aıta keteıik, byltyr dál osy merzimde óńirimizde úsh órt tirkelgen. Bıyl tilsiz jaýdyń jıileýine qardyń erte erip, dalanyń tez qurǵaýy sebep bolǵan deıdi departament mamandary.
Endi oblystyq tótenshe jaǵdaılar departamenti órt qaýpiniń aldyn alý maqsatynda saıajaılarǵa reıd júrgizýdi josparlap otyr.
