Qostanaı oblysynda ónerkásip óndirisiniń kólemi 30 paıyzǵa artty
QOSTANAI. QazAqparat - Qostanaı oblysynyń ónerkásip óndirisinde aıtarlyqtaı ósim baıqalady. Bul týraly oblys ákimdiginde ótken keńeıtilgen jıynynda aıtyldy, dep habarlaıdy QazAqparat.
Basqosýda Qostanaı oblysy ákiminiń orynbasary Erlan Qoıshybaevtyń baıandamasy tyńdaldy. Jalpy, búginde oblys ónerkásibi jańa qarqyn alǵan. Ásirese, taý-ken jáne óńdeý salalarynda basymdyq mol. Oblysta 700-den astam kásiporyn turaqty jumys istese, olarda 43 myń adam eńbektenedi.
«Osy jyldyń 4 aıynda ónerkásip óndirisiniń kólemi qoldanystaǵy baǵa boıynsha 329 mlrd teńgeni qurap, ótken jylmen salystyrǵanda 30%-ǵa artty. Óndirilgen ónimniń naqty kólemi ótken jylmen salystyrǵanda 11%-ǵa ósti, sonyń ishinde taý-ken salasynda 5,7%-ǵa jáne óńdeý sektorynda 17,4%-ǵa ulǵaıdy. Ónerkásip óndirisi qurylymyndaǵy taý-ken salasynyń úlesi 40% - dy quraıdy, bul - oblys eksportynyń basty tetigi. Qazir aımaqta mys kenin óndirý kezinde eń úlken ósim baıqalady. Ol byltyrǵydan 2,2 esege artqan», - dedi Erlan Qoıshybaev.
Sonymen qatar, bıyl maı, et ónimderi jáne alkogolsiz sýsyndar óndirisiniń ósimi tirkeldi. Óńir un óndirýden respýblıkada 1-orynda bolsa, kúnbaǵys maıyn shyǵarýda 2-orynda. Sút men kondıterlik ónimderdiń naryqtaǵy ótimi joǵary.
«Indýstrııalandyrý baǵdarlamasynyń arqasynda oblys kásiporyndary básekege qabiletti ónim shyǵaryp, shetel naryǵyn ıgerýde jemisti jumys atqaryp keledi. Ótken jyldarmen salystyrǵanda kondıterlik ónimderdiń eksporty 4 eselendi, un eksporty 1,5 ese artty. 2016 jyldan bastap jeńil avtomobılderdi eksportqa shyǵarý júzege asyrylýda. Óńdeýshi ónerkásiptiń aıtarlyqtaı úlesi metallýrgııaǵa tıesili. Odan túsken tabys 36,5 mlrd teńgeni qurady», - dedi oblys ákiminiń orynbasary.
