Qostanaı oblysynda óndiristegi jazataıym oqıǵalar edáýir kemigen
QOSTANAI. QazAqparat - Qostanaı oblysynda óndiristik jaraqat jaǵdaılary ótken jyldarmen salystyrǵanda birshama kemigen. Bul týraly óńirlik kommýnıkatsııalar qyzmetinde ótken brıfıngte oblystyq eńbek ınspektsııasy basqarmasy basshysynyń orynbasary Baqytjan Makeev málimdedi, dep habarlaıdy QazAqparat.
Óńirde jumys berýshilerdiń deni eńbek qaýipsizdigine jete kóńil bóle bermeıdi. Degenmen, bıylǵy 7 aıda ótken jylǵy kórsetkishpen salystyrǵanda óndiristegi jaraqat deńgeıi birshama tómendegen. Máselen, óndiristegi qaıǵyly jaǵdaılar 91-den 66-ǵa nemese 27 paıyzǵa, al ólim-jitim sany 9 paıyzǵa azaıǵan.
Baqytjan Makeevtiń aıtýynsha, óńirde óndiristik jaraqat jaǵdaılary kóbinese taý-ken, kommýnaldyq jáne aýyl sharýashylyǵy salalarynda jıi oryn alady.
«Aǵymdaǵy jyly taý-ken metallýrgııa ónerkásibinde óndirispen baılanysty apattardan 8 adam zardap shekse, ótken jyly 15 jaǵdaı tirkelgen. Osylaısha, kórsetkish bıyl 46 paıyzǵa tómendegen. Óńirler boıynsha salystyryp aıtar bolsaq, óndiristegi jazataıym jaǵdaılardyń joǵary kórsetkishi Qostanaı (23), Rýdnyı (9), Arqalyq (5), Lısakov (4) qalalary men Áýlıekól (5) jáne Uzynkól (4) aýdandarynda saqtalyp otyr. Al, ólim-jitim oqıǵalary Qostanaı qalasyndaǵy «Kost-Den», «RSO Sáýlet», «Dostar-09, «Qostanaı Joldary» seriktestikteri, Áýlıekól aýdanyndaǵy úsh kásiporynda bolǵan», - dedi ınspektsııa mamany.
Ótken jyldardyń tájirıbesi kórsetip otyrǵandaı, kóptegen jumys berýshiler qaýipsizdik pen eńbekti qorǵaý máselelerine nazar aýdarmaıdy, eńbek quqyǵyn qorǵaýdyń ulttyq jáne halyqaralyq standarttaryn oryndamaıdy. Keıbir kásiporyndarda eńbek qaýipsizdigi jáne eńbekti qorǵaý boıynsha jaýapty tulǵalar joq, jeke jáne ujymdyq qorǵanyspen qamtamasyz etýge bólingen qarajat jetkiliksiz, eńbek jaǵdaılary boıynsha jumys oryndaryn attestatsııalaý boıynsha jumystar júrgizilmeıdi, merzimdi medıtsınalyq tekserýler ótpeıdi. Baqytjan Makeev aıtqandaı, óndiristegi jazataıym oqıǵalar kóbine kezdeısoq apat retinde qabyldanady.
