Qostanaı oblysynda oqýshylarǵa qosymsha sabaqtar engiziledi

QOSTANAI.QazAqparat – Qostanaı oblysynyń mektepterinde ata-analardyń kelisimimen oqýshylar úshin qosymsha sabaqtar ótkizilýi múmkin. Bul týraly Óńirlik kommýnıkatsııalar alańynda ótken brıfıngte Qostanaı oblysy ákimdigi bilim basqarmasynyń basshysy Záýre Baımenova aıtty, dep habarlaıdy QazAqparat tilshisi.

Basqarma basshysy aıtqandaı, 3-toqsandaǵy oqytý formatynda birqatar ózgerister bar. 9, 11 synyp oqýshylarynyń aralas oqytý formatyna kóshýi qorytyndy attestattaý jáne ulttyq biryńǵaı testileý daıyndyǵyna negizdelgen. Qazir bul synyptar ata-analardyń kelisiminsiz aralas formatta jumysqa kiristi.

«Qashyqtan oqytýdy 114 mektep júzege asyrady. Munda 38,5 myńǵa jýyq oqýshy bilim alady. 3-toqsanda 6 mekteptiń janyndaǵy ınternattyń jumysy qaıta jalǵasady. Sondaı-aq, oblystyq daryndy balalarǵa arnalǵan mektep-ınternattary da bilim berýdiń qalypty júıesine kóshti. Osy toqsanda ata-analar jáne pedagogtardyń kelisimimen sany 5 balaǵa deıingi toptarda qosymsha sabaqtar ótkizilýi múmkin. Budan bólek sabaqtan tys ýaqytta jeke konsýltatsııalar uıymdastyrylady. Munyń bári osy ýaqytqa deıin jiberilgen olqylyqtardyń ornyn toltyrý úshin jasalyp otyr», - deıdi Záýre Báımenova.

Oblys kolledjderiniń stýdentteri úshin de oqytý formaty ózgerdi. Ekinshi semestrde kolledjderdiń birinshi kýrs stýdentteri shtattyq formatta oqýǵa kóshti. Óıtkeni olar úshin oqytýshylar korpýsymen tikeleı jumys isteý mańyzdy.

«Mektepke deıingi balalar uıymdary jumysyn kezekshi toptar formatynda jalǵastyrýda. Qaýlyǵa sáıkes toptarda shuǵyldanatyndar sany 15 adamnan aspaıdy, jumys rejımi saǵat 9:00-den 20:00-ge deıin belgilendi. Balalar sektsııalarynyń, úıirmelerdiń, fakýltatıvterdiń jumysyna demalys jáne mereke kúnderi ruqsat berilmeıdi», - dedi basqarma basshysy.