Qostanaı oblysynda naızaǵaı túsip, 5 orman alqaby órtendi
QOSTANAI.QazAqparat – Qostanaı oblysynda 5 birdeı orman alqabyna naızaǵaı túsip, órt shyqty, dep habarlaıdy QazAqparat oblystyq Tótenshe jaǵdaılar departamentiniń baspasóz qyzmetine silteme jasap.
21 shilde kúni Áýlıekól, Qarabalyq, Naýyrzym jáne Jitiqara aýdandarynda jerge túsken naızaǵaı synyǵynan orman alqaptary órtendi. Barlyq órt ýaqytynda sóndirildi. Tilsiz jaý jalpy aýdany 56,47 ga orman alqabyn sharpyp úlgergen, alaıda eldi mekenderge qaýip tóndirmedi.
«Órt bolǵan alqaptarǵa oblystyq tótenshe jaǵdaı departamentiniń órt sóndirýshileri men orman sharýashylyǵynyń qyzmetkerleri shyqty. Jeke quramnyń 8 qyzmetkeri men 2 tehnıkasy, orman sharýashylyqtary tarapynan 26 tehnıka men 64 jumysshy jumyldyryldy. Zardap shekkender joq. Órt sóndirýshiler men qutqarýshylardyń jedel qımylynyń arqasynda ormandy sharpyǵan órt der ýaqytynda sóndirildi», - delingen TJD baspasóz qyzmetiniń aqparatynda.
Tótenshe jaǵdaılar departamentiniń qyzmetkerleri ormandarda reıdke shyǵyp, azamattarǵa qaýipsizdik erejelerin túsindiredi. Degenmen, aptap ystyqta ormanǵa baryp demalýshylardyń azaımaı turǵanyn aıtady mamandar.
