Qostanaı oblysynda myltyq qorabyna marıhýana jasyrǵan er adam ustaldy

QOSTANAI. QazAqparat – Qostanaı qalasynda asa iri kólemde esirtki saqtaǵan er adam ustaldy, dep habarlaıdy QazAqparat oblystyq polıtsııa departamenti baspasóz qyzmetine silteme jasap.

Tártip saqshylary jedel iz kesý sharalary barysynda Qostanaı jataqhanalarynyń biriniń aýmaǵynda 33 jastaǵy er adamdy ustady. Onyń qaltasynan erekshe ıisi bar jasyl tústi zatpen qaptalǵan bes túıinshek tabyldy.

«Saraptama qorytyndysyna sáıkes, er adamnyń qaltasyndaǵy zat 30 gramm keptirilgen marıhýana bolyp shyqty. Odan ári kúdikti marıhýananyń qalǵan bóligin jasyryp qoıǵanyn aıtty. Polıtsııa qyzmetkerleri myltyq qorabynan taǵy eki polıetılen oramasyn tapty. Osylaısha 118 gramm esirtki zaty tárkilendi. Bul esirtki zatynyń iri kólemine jatady. Atalǵan derek boıynsha qylmystyq is qozǵaldy», - deıdi Qostanaı oblysy polıtsııa departamenti esirtki qylmysyna qarsy is-qımyl basqarmasynyń bólim bastyǵy Lev Kvasenko.

Dál osyndaı oqıǵa «Aeroport» shaǵynaýdanynda boldy. Polıtseıler 35 jastaǵy er adamdy ustap, 20 gramm geroın tárkiledi. Kúdikti qamaýǵa alyndy.