Qostanaı oblysynda muz jarý jumystary bastaldy

QOSTANAI. QazAqparat - Sý tasqynynyń aldyn alý jáne muz keptelisterin boldyrmaý maqsatynda alǵashqy jarylys jumystary Taran aýdanynyń Maı jáne Áıet aýyldarynda - Aıat ózeninde bastaldy, dep habarlaıdy QazAqparat.

Oblystyq TJD baspasóz hatshysy Ýálıhan Dosanovtyń sózine sensek, bıyl muz jarý jumystary jyldaǵydan erterek bastaldy.

«Atalǵan sharalardy «NIKSIT» JShS uıymdastyrdy. Olar aldymen Aıat ózenin, keıin, Arqalyqtaǵy Qaıyńdy sý qoımasynyń muzyn jardy. Tasqynǵa qarsy bul sharalar ózen arnasyn muz bitep qalmaýy, muzdy qopsytý, seń keptelisterin boldyrmaý jáne tasqyn sýlardy apattyq jaǵdaılarsyz jiberý maqsatynda júrgizildi. Osy tusta balyqshylardy kóktemgi muzǵa shyqpaýǵa, ómirlerin táýekelge tikpeýge shaqyramyz», - deıdi Ýálıhan Dosanov.

Jarylys jumystary arnaıy komıssııanyń baqylaýynda ótip jatyr. Mamandardyń aıtýynsha, muz jarý jumystary seń júrý bastalǵanǵa deıin júrgizilýi tıis.