Qostanaı oblysynda muǵalimder jetispeıdi
QOSTANAI. QazAqparat - Qostanaı oblysynda 200-ge jýyq pedagog mamany jetispeıdi. Bul týraly A.Baıtursynov atyndaǵy Qostanaı memlekettik ýnıversıtetinde oblys ákimi A.Muhambetovtiń qatysýymen ótken jıynda aıtyldy, dep habarlaıdy QazAqparat.
Jıynda mektep jumysyn jetildirý, oqý-tárbıe protsesiniń sapasyn arttyrý syndy máseleler sóz etildi. Qazirgi ýaqytta óńirde shaǵyn jınaqty mektepterdegi kadrlardyń turaqtamaýy problemaǵa aınalyp otyr. Onyń basty sebebi - kez kelgen mamanǵa JOO-da alǵan mamandyǵy boıynsha tolyq júktememen jumys usyný múmkindiginiń bolmaýy. Sonymen qatar birneshe bilim berý deńgeıleriniń baǵdarlamalarymen shaǵyn keshendi mektepte jumys isteý qıyndyǵy baıqalady. Óıtkeni muǵalim ár jastaǵy balalardy oqytady.
«Jas mamandardy turǵyn úımen qamtamasyz etý máselesi de ózekti. Basty mindetimiz - óńir úshin básekege qabiletti pedagogıkalyq kadrlardy daıarlaýǵa baǵyttalǵan akademııalyq qyzmetti jetildirý. Osy maqsatqa jetý úshin joǵary bilikti pedagog kadrlardy daıarlaý úshin jaǵdaı jasaý qajet. Ár aýdan-qalanyń ákimi bul máseleni jiti qadaǵalýyna alsyn», - dedi Arhımed Muhambetov.
Y.Altynsarın atyndaǵy Arqalyq memlekettik pedagogıkalyq ınstıtýtynyń rektory Seıitbek Qýanyshbaev joǵaryda atalǵan problemalardy sheshý joldaryna toqtaldy.
«Mektepterdiń 60%-dan astamy Qostanaı oblysynyń Arqalyq qalasyna jaqyn ornalasqan kentterge, Jankeldın jáne Amankeldi aýdandaryna tıesili. Búgingi kúni pedagogıkalyq kadrlarǵa degen qajettilik 200-ge jýyq mamandy quraıdy. Bastaýysh býyn muǵalimderiniń, matematıka, fızıka, hımııa, orta býyn aǵylshyn tili muǵalimderiniń tapshylyǵy únemi baıqalady. Mektepke deıingi bilim berý uıymdarynda mamandardyń jetispeýshiligi ózekti másele bolyp otyr. Instıtýt jyl saıyn 250-ge jýyq bilim bakalavrlaryn daıarlaıtynyna qaramastan, aýyldarda mamandardyń jetispeýshiligi azaımaıdy, bul pedagogıkalyq júktemeniń tómendigine baılanysty. Osyǵan baılanysty, 2018 jyldan bastap ınstıtýt "Matematıka-Fızıka", "Matematıka-Informatıka", "Fızıka-Informatıka" bolyp qosarlas mamandyqtar daıarlaýǵa kóshti», - dedi S.Qýanyshbaev
2018-2019 oqý jyly atalmysh ınstıtýt ózge bilim berý mekemelerinde mamandardyń jetispeýine baılanysty joǵary kýrstardan 66 stýdentti pedagogıkalyq qyzmetke ornalastyrdy. Oqý protsesi kezinde dýaldy oqýǵa qatysqan stýdentter dıplom alǵannan keıin mektep dırektorlarymen kelisim-shart negizinde jumysqa turady.
Arhımed Muhambetov ınstıtýt rektorynyń jumysyna oń baǵasyn berip, osy bastalǵan naýqandy ári qaraı sátti júzege asyrýdy tapsyrdy.
