Qostanaı oblysynda mınıstrmen kezdesken muǵalimder qordalanǵan máselelerdi kóterdi
«Búgin jumys sapary barysynda Qostanaı oblysyndaǵy mektepterge bardym. Mıchýrın aýyldyq mektebi dırektorynyń belsendiligi jáne onyń bilim berý uıymy jaıly, oqý úrdisi týraly qyzyǵýshylyqpen aıtyp bergeni qýantty. Dırektor jyl saıyn mektep kóbirek qarajat alatynyn aıtty. Máselen, bıyl «Nur Otan» partııasynyń baǵdarlamasy sheńberinde mektepti modernızatsııalaýǵa qosymsha qarjy bólingen.
Sapar barysynda áriptesterimmen de áńgimelestim. Muǵalimder jańa oqý jylynyń erekshelikteri týraly aıtyp berdi. Olar 45 mınýttyq sabaqqa oralý máselesine oń baǵa berdi. Óıtkeni pedagogter bul ýaqytty ótken materıaldy qaıtalaýǵa jáne oqýshylardyń bilimindegi olqylyqtardyń ornyn toltyrýǵa jumsaıdy. Muǵalimder bilim alýshylardyń oflaın formattan keıin dástúrli oqý protsesine qaıta beıimdelýlerine emotsıonaldyq turǵyda qoldaý kórsetý úshin bar kúsh-jigerin jumsap jatyr.
Sondaı-aq bastaýysh synypta oqıtyn búldirshindermen áńgimelestim. Olar onlaın oqý formaty yńǵaısyz bolǵanyn, al búgingi tańda muǵalimderimen qaýyshyp, synyptastaryn kórgenderine jáne dástúrli formatta bilim alyp jatqandaryna qýanyshty ekenderin aıtty.
Oqý kabınetterin aralap shyqqannan keıin beınebaqylaý kameralary men dabyl batyrmalarynyń jumysyn tekserdim.
Sondaı-aq ol qaladaǵy №27 orta mektebine bardym. Oqý kabınetterin aralap, uıymnyń materıaldyq-tehnıkalyq jabdyqtalýymen, mektep kitaphanasymen tanystym. Ustazdarmen jáne oqýshylarmen áńgimelestim. Sonymen birge bilim berý uıymdarynyń jáne oblystaǵy aýdandyq bilim bólimderiniń basshylarymen kezdestim»,-dedi A.Aımaǵambetov.
Mınıstrdiń aıtýynsha, eki saǵat kóleminde pedagogter, mektep jáne kolledj basshylary dırektorlardy taǵaıyndaý erejelerine, rotatsııalaýǵa, muǵalimderdi jumysqa qabyldaýǵa, bilim berý salasynda vertıkaldy basqarý júıesin engizýge qatysty suraqtar qoıdy. Muǵalimderdi qaıta daıarlaýdyń mańyzy jáne tirek (resýrstyq) mektepterdiń bekitilgen bilim berý uıymdarymen ózara baılanysyndaǵy qıyndyqtar, aýyldyq mektepterde jan basyna qarjylandyrýdy engizý qajettiligi týraly aıtyldy. Kolledj qyzmetkerleri akademııalyq erkindik, kolledjder men joǵary oqý oryndarynyń bilim berý baǵdarlamalaryn sınhronızatsııalaý máselelerin kóterdi. Sondaı-aq kolledjden keıin stýdent bilim alý úrdisin joǵary oqý ornynda jalǵastyrǵan kezde onyń kolledjdegi nátıjeleriniń JOO-da eskerilýi syndy suraqtar talqylandy.
«Oqýǵa qushtar mektep» jobasy oblysta belsendi júzege asyrylyp jatqanyna, sondaı-aq kórkem ádebıet satyp alynǵanyna, mektep kitaphanalarynyń modernızatsııalanyp jatqanyna rıza boldym»,-dedi mınıstr.
