Qostanaı oblysynda memqyzmetterdiń 91 paıyzy elektrondy formatqa kóshirildi

QOSTANAI. QazAqparat – 2020 jyly Qostanaı oblysynda memlekettik qyzmetterdiń 91 paıyzy elektrondy túrde kórsetildi. Bul týraly jýrnalıstermen ótken brıfıngte QR Memlekettik qyzmet isteri agenttiginiń Qostanaı oblysy boıynsha departamentiniń basshysy Ashat Eskendirov aıtty, dep habarlaıdy QazAqparat tilshisi.

Qostanaı oblysynda Memleket basshysynyń tapsyrmasyna sáıkes, memlekettik qyzmetterdi elektrondy formatqa kóshirý jumystary keshendi túrde iske asyp keledi. 2020 jyly oblys turǵyndaryna memlekettik qyzmettiń 91%-y elektrondyq formatta kórsetildi. Óńirdiń atqarýshy organdarynyń reestrinde 374 qyzmet tizimi bar.

«Memlekettik qyzmetterdi avtomattandyrý jergilikti atqarýshy organdardaǵy zańbuzýshylyqtardy 9 esege qysqartyp, olardy kórsetý sapasyna oń áserin tıgizdi. Jalpy 2007-2021 jyldar aralyǵynda engizilgen memlekettik qyzmetter sany 5 esege artty. Tek osy jyldyń ózinde Qostanaı oblysynyń turǵyndary byltyrǵydan 11 qyzmet artyq alady. Atap aıtqanda, «Bastaý Bıznes», «»Múgedekterdi ymdaý tili mamanynyń qyzmetterimen qamtamasyz etýge qujattardy resimdeý», «Múgedekterdi tehnıkalyq-kómekshi (ornyn toltyrýshy) quraldarmen qamtamasyz etýge qujattardy resimdeý» syndy suranys kóp túsken qyzmetter qosyldy», - dedi A.Eskendirov.

Qostanaıda memlekettik organdar halyqqa tıimdi bolý úshin birqatar qyzmetterdi retke keltirdi. Sonymen qatar qyzmetterdiń deni portaldarda qoljetimdi. Bul sybaılas jemqorlyq qaýpin azaıtyp, qaǵazbastylyqtan qutylýǵa kómektesedi deıdi agenttik mamandary.