Qostanaı oblysynda maldyń brýtsellezge shaldyǵýy eki esege tómendedi
QOSTANAI. QazAqparat - Byltyr Qostanaıda epızootııalyq ahýal turaqty boldy. Veterınarııa salasyndaǵy jumystar bıyl da jalǵasyn tabady, dep habarlaıdy QazAqparat.
Qostanaı oblysynda 411 myń bas mal teri aýrýlaryna qarsy egilmek. Jalpy, sońǵy 4 jyl ishinde óńirde iri qara maldyń brýtsellez dertine shaldyǵý deńgeıi birshama tómendedi.
Byltyr óńirde epızootııalyq ahýal turaqty boldy. Máselen, 2014 jyly iri qara maldyń brýtsellez dertine shaldyǵý deńgeıi 1 paıyz bolsa, byltyr bul kórsetkish 2 esege tómendedi. Mundaı nátıjege veterınarlar tek tólderdi juqpaly aýrýlarǵa qarsy jappaı egý sharalarymen qamtýdyń arqasynda ǵana emes, jeke sektorlar men sharýa qojalyqtarynda atqarylǵan josparly, júıeli jumystardyń nátıjesinde qol jetkizip otyr.
«Egý jumystary 2019 jyldyń aqpan aıynda bastalady. 3 aıdyń kóleminde tolyǵymen aıaqtaımyz. Barlyq aýdanǵa dári-dármekter jiberiledi. Bıyl juqpaly aýrýdyń 11 túrine qarsy tólderge egý sharalary, 35 túrli aýrýǵa dıagnostıkalyq zertteý júrgiziledi. Sonymen qatar jergilikti aýmaqqa tán aýrýlardyń aldyn alý qatań baqylaýda. Muny ǵylymda enzootııa dep ataıdy, ıaǵnı, ınfektsııalyq aýrýdyń bir mezgilde taralýy, atalǵan aýrýdyń jappaı taralýyn shekteıtin tabıǵı jáne sharýashylyq-ekonomıkalyq jaǵdaıdy birqalypta ustaımyz», - deıdi oblystyq veterınarııa basqarmasy basshysynyń orynbasary Baýyrjan Beket.
Veterınarlar maldyń juqpaly aýrýlarynyń aldyn alýdyń joly vaktsınatsııa ekenin eskertedi. Sol sebepti veterınarlyq qaýipsizdik sharalary bıyl da kúsheıtiledi.
Aıta keterligi, jaqynda ótken máslıhat sessııasynda depýtattar oblys bıýdjetinen osy salaǵa qosymsha 78 mln teńge bólý jónindegi usynysty qoldady.
