Qostanaı oblysynda mádenıet nysandarynyń jumysyna ruqsat etildi

QOSTANAI. QazAqparat – Búgin oblys ákimi Arhımed Muhambetov koronovırýsqa qarsy kúres jónindegi jedel shtabtyń kezekti otyrysyn ótkizdi, dep habarlaıdy QazAqparat oblys ákiminiń baspasóz qyzmetine silteme jasap.

Jıyn barysynda polıtsııa departamentiniń bastyǵy, Áýlıekól men Meńdiqara aýdandarynyń ákimderi óńirdiń epıdemııalyq jaǵdaıy týraly esep berdi. Sonymen qatar monıtorıngtik toptardyń jumysy qarastyryldy. Arhımed Muhambetov kelip túsken usynystarǵa oraı shtabqa 2021 jylǵy 15 aqpannan bastap karantın rejımin jeńildetýdi usyndy.

Óńirdiń memlekettik bas sanıtar dárigeriniń sheshimimen birqatar jeńildikter engizildi:

1. Aptanyń barlyq kúnderinde shashtarazdar, sulýlyq salondary, manıkıýr, pedıkıýr, kosmetologtyń jumysyna ruqsat etý;

2. Jeksenbiden basqa kúnderi SOO, sýpermarketter, gıpermarketter, aýdany 2000 sharshy metrden asatyn azyq-túlikke jatpaıtyn taýarlar satatyn dúkenderge saǵat 10-nan 23-ke deıin jumys isteýge ruqsat etildi;

3. Qoǵamdyq tamaqtaný nysandary qyzmet kórsetý múmkindiginiń 50%-yn paıdalanyp, aptanyń barlyq kúnderi saǵat 7-den 24-ke deıin jumys isteı alady. Biraq oryndyqtar sany 30-dan aspaýy kerek;

4. Qalalyq qoǵamdyq kólikter aptanyń barlyq kúnderi jumys isteıdi;

5. Aptanyń barlyq kúnderi saǵat 7-den 22-ge deıin jabyq sporttyq-saýyqtyrý jáne fıtnes ortalyqtaryna qyzmet kórsetý múmkindiginiń 30%-yn paıdalana otyryp jumys isteýine ruqsat etiledi;

6. Mádenıet nysandarynda 30 adamǵa deıingi ujymdardyń daıyndyq jumystaryn júrgizýine ruqsat etiledi;

7. Teatrlardyń, kınoteatrlardyń jumys isteýine ruqsat etiledi. Biraq bul nysandar kórermen qabyldaý múmkindiginiń 20%-yn ǵana paıdalana alady. ıAǵnı, bir qoıylymǵa 100 adam qabyldaı alatyn teatrlarǵa 20 adam ǵana kire alady;

8. Fýdkordtar úshin taǵamdy berip jiberýge nemese jetkizip berýge ǵana ruqsat etiledi.