Qostanaı oblysynda «Qyzyl kitapqa» engen qusty atqandar ustaldy
QOSTANAI.QazAqparat – Qostanaı oblysynda «Brakoner» operatsııasy júrgizilip, zań buzǵandar anyqtaldy, dep habarlaıdy QazAqparat.
Іs-shara barysynda polıtsııa qyzmetkerleri men tabıǵatty qorǵaý uıymdarynan 59 mobıldik top quryldy. Qyzmetkerler ańshylyq jerlerinde, sý aıdyndarynda jáne orman alqaptarynda tabıǵat qorǵaý zańnamasyn buzýdyń jolyn kesý jáne anyqtaý boıynsha 1590-nan astam reıdtik is-shara ótkizdi.
«Polıtsııa qyzmetkerleri zańsyz ań aýlaý jáne aǵash kesý derekterine qatysty 4 qylmystyq quqyq buzýshylyqty anyqtady. Qostanaı aýdanynyń Lımannyı aýylynyń mańynda polıtsııa qyzmetkerleri «VAZ 2121» avtokóligin toqtatqan. Avtomobıl júk salǵyshyn tekserý kezinde eki sibir eligi jáne tirkeýge alynǵan úsh myltyq tabyldy. Belgili bolǵandaı, jolaýshylardyń bireýi eki elik atyp alǵan», - delingen oblystyq polıtsııa departamenti baspasóz qyzmetiniń aqparatynda.
Zańsyz ań aýlaýdyń taǵy bir deregi Qamysty aýdanynda tirkelgen. Taldykól aýylynan 10 shaqyrym jerde Rýdnyı qalasynyń eki turǵyny ustaldy. Ań aýlaıtyn sharýashylyqta júrgen ańshylar 7 qaz atqan, olardyń biri – Qyzyl kitapqa engizilgen «Shıqyldaq qaz» tuqymy.
Jalpy, ań aýlaý erejelerin buzǵany úshin 72 adam ákimshilik jaýapkershilikke tartyldy. Balyq aýlaý erejelerin buzǵany úshin 23 balyqshy, sondaı-aq 26 ańshy qarýdy saqtaý, alyp júrý jáne tasymaldaý erejelerin buzǵany úshin aıyppul arqalady. Aıta keterlik jaıt, jedel aldyn alý is-sharasy kezinde 700 myń teńgeden astam ákimshilik aıyppul óndirildi.
