Qostanaı oblysynda qyzmet barysynda kóz jumǵan polıtseılerge eskertkish qoıyldy
QOSTANAI. QazAqparat – Qostanaı oblysynyń Jankeldın aýdanynda qyzmettik mindetterin atqarý kezinde qaza tapqan polıtsııa qyzmetkerlerine arnalǵan eskertkish taqtasy ashyldy, dep habarlaıdy QazAqparat.
Qazirgi tańda polıtsııa departamenti jas urpaqty Otanǵa laıyqty qyzmet etý rýhynda patrıottyq tárbıege erekshe kóńil bóledi. Jastar Halyq qaharmany Ǵazız Baıtasov pen Shalqar Aqymǵalıevtiń erlikteri men janqııarlyǵyn úlgi tutady. Buǵan deıin oblystaǵy bes aýdanda osyndaı eskertkish ashylǵan bolatyn. Eskertkishti Jangeldın aýdanynyń polıtsııa bólimi men ákimdigi birlesip ornatty.
Іs-sharaǵa aýdan ákiminiń orynbasary Roza Aqqalıeva, Torǵaı aýylynyń ardagerler keńesiniń tóraǵasy Jylqybaı Bákirov, aýdandyq polıtsııa bóliminiń ardageri Qudaıbergen Ámirjanuly, mektep oqýshylary jáne jergilikti turǵyndar qatysty.
«Bul eskertkish taqtasy – erjúrek áriptesterimizge degen sheksiz alǵysymyzdyń dáleli. Polıtsııa qyzmetkerleriniń óz isin jaqsy kórýi jáne naǵyz kásibı bolýy mańyzdy. Oblysta qyzmettik boryshyn oryndaý kezinde 42 polıtseı kóz jumdy, onyń 11-i qylmyskerdi ustaý kezinde ajal qushty», - dep atap ótti polıtsııa departamenti arnaıy jumyldyrý daıyndyǵy basqarmasynyń bastyǵy Erlan Mýsın.
Іshki ister organdarynyń ardageri Qudaıbergen Ámirjanulynyń aıtýynsha, Jangeldın aýdany úshin eskertkishtiń ashylýy eshkimdi beı-jaı qaldyrmaıdy. Ótkendi eske alý – bul búginginiń isi. Bul jas urpaqty qurmet pen patrıottyqqa tárbıeleýdiń ǵajap úlgisi. Іs-shara jergilikti ártisterdiń daıyndaǵan kontserttik baǵdarlamasymen jalǵasty.
