Qostanaı oblysynda qyrylǵan kıikterden pasterellez qozdyrǵyshy tabyldy - AShM
ASTANA. 29 mamyr. QazAqparat - Keshe QR Qostanaı oblysynyń orman jáne ańshylyq sharýashylyǵynyń aýmaqtyq ınspektsııasymen kıikterdiń jappaı qyrylý sebebin anyqtaý boıynsha komıssııanyń alǵash otyrysy ótti.
Onyń barysynda málim bolǵandaı, Qostanaı oblysyndaǵy «Respýblıkalyq veterınarlyq zerthana» mekemesiniń aldyn ala qorytyndysy boıynsha kıikterdiń qyrylý oshaǵynan pasterellez qozdyrǵyshy anyqtalǵan. Bul týraly búgin Aýyl sharýashylyǵy mınıstrliginde ótken brıfıng barysynda málim boldy.
Eske sala keteıik, kıikterdiń qyrylýyna oraı buǵan deıin birqatar faktiler anyqtalǵan edi. Soǵan baılanysty, Aýyl sharýashylyǵy mınıstrliginiń Orman jáne ańshylyq sharýashylyǵy komıteti Jangeldi aýdanynyń ákimdigimen birlese qyrylǵan kıikterdi kómý boıynsha jumystar júrgizýde. «Máselen, alǵash ret 19 mamyrda tirkelgen kıikterdiń jappaı qyrylý oshaǵynda janýarlardyń 623 ushasy tabylyp, onyń 603 kómildi. Qalǵan 20 ushasy jaqyn arada kómiledi. Ekinshi ret 24 mamyrda tirkelgen kıikterdiń jappaı qyrylý oshaǵynda janýarlardyń 290 ushasy tabyldy, onyń 136 ushasy kómildi. Kıik ólekselerin kómý sharalary jalǵasýda», - delingen baspasóz qyzmeti taratqan habarlamada.
Budan bólek, búgingi kúni kıikterdiń taralý aımaǵyna MI-2 tikushaǵyn qoldaný arqyly monıtorıng júrgizilýde. Júrgizilgen monıtorıngtik zertteý nátıjeleri boıynsha Aqtóbe, Aqmola, Qyzylorda jáne Qaraǵandy oblystarynda kıikterdiń jappaı qyrylý faktileri tirkelmegen.
