Qostanaı oblysynda qylmys deńgeıi úsh ese tómendedi
«Bıyl qylmystyń negizgi túrleri boıynsha turaqty tómendeý baıqalady. Olardyń qatarynda kisi óltirý, densaýlyqqa aýyr zııan keltirý, zorlaý, qaraqshylyq, tonaý, urlyq, alaıaqtyq, buzaqylyq jáne kólikti aıdap áketý sıqty qylmys bar. Óńir úshin ózekti másele — mal urlyǵy. Kóptegen otbasy úshin mal negizgi tabys kózi. Bıyl mal urlyǵynyń sany 30% - ǵa azaıdy. 189 urlyqtyń 124-i erkin jaıylymda jasalǵan, al 150-ge jýyq jaǵdaıda qaraýsyz qalǵan mal qaıtadan erkin jaıylymnan tabylmaǵan. Sondyqtan men turǵyndarǵa tórt túlikti qaraýsyz qaldyrmaýǵa shaqyramyn. Óıtkeni 15 qazannan bastap oblys máslıhatynyń sheshimimen aýyl sharýashylyǵy janýarlaryn jaıý erejeleri belgilegen. Mal ıesin de ákimshilik jaýapkershilikke tartý týraly másele qaralatyn bolady»,-dep atap ótti Beket Aımaǵambetov.
Qostanaı oblysynda buryn sottalǵan adamdar jasaǵan qylmystardyń sany da aıtarlyqtaı azaıǵan. Jasóspirimder qylmysy men qoǵamdyq oryndarda, kóshelerde jasalǵan qylmystar sany 40% - ǵa kemigen.
«Munyń barlyǵy júrgizilip jatqan aldyn alý jumystaryna tikeleı baılanysty. Birneshe jyldan beri oblysta turǵyn úı aýlalarynda jaıaý patrýl tájirıbesi jalǵasýda. Bıyl qylmystyń kóptegen túrleri, sonyń ishinde múliktik sıpattaǵy urlyq boıynsha qylmysty ashý jaqsardy. Asa aýyr qylmys túrleriniń ashylýy artty. Asa aýyr qylmystar qatarynan biz qaraqshylyq, tonaý, buzaqylyq, jas balalardy azǵyndyqqa ıtermeleý, kólikti aıdap ketý qylmystaryn 100% - ǵa ashtyq. Kisi óltirýdiń 92% - y, densaýlyqqa aýyr zııan keltirýdiń barlyq deregi (98%) anyqtaldy. Bıyl zańsyz aınalymnan 473 keliden astam esirtki zaty tárkilendi», - deıdi polıtsııa generaly.
Barlyq qylmystyq isterdiń jartysynan astamy elektrondyq formatta tergeledi, al árbir úshinshi qylmystyq is sotqa deıingi jedeldetilgen tergeý tártibimen jiberildi. Bul úshin oblystyń tergeý jáne anyqtaý bólimsheleri qajetti tehnıkamen qamtamasyz etilgen.
