Qostanaı oblysynda quny 1 trln teńgeden astam ónerkásip ónimderi óndirildi
QOSTANAI. QazAqparat – Búgin Arhımed Muhambetovtiń qatysýymen ótken keńeıtilgen otyrysta Qostanaı oblysynyń 2019 jylǵy áleýmettik-ekonomıkalyq damý qorytyndylary talqylanyp, bıylǵa jańa mindetter qoıyldy, dep habarlaıdy QazAqparat.
Oblys ákimdiginiń ekonomıka jáne bıýdjetti josparlaý basqarmasynyń basshysy Gúlbaram Musaǵazına óńir ekonomıkasy týraly málimet berdi.
Onyń sózinshe, byltyr oblys ekonomıkasyna 288,1 mlrd. teńge tartyldy. Ónerkásip ónimderi kólemi alǵash ret 1 trln teńgeden asqan.
«Ónerkásip ónimderin óndirý 15,3%-ke, qurylys jumystary 6,6%-ke, turǵyn úı salý – 12,1%-ke ósti. Syrtqy ınvestıtsııalar 2,4%-ke ulǵaıdy. Syrtqy saýda aınalymy 13,8%-ke artyp, 2,1 mlrd AQSh dollaryna jetti. 2019 jyly «SaryArqaAvtoProm» 24 myńnan astam jeńil avtomobıl óndirdi. Bul seriktestik eksportynyń 9 esege kóbeıýine yqpal etti. Ósim kombaın shyǵaratyn «Agromash Holdıng» zaýytynda da baıqalady. Agroónerkásip salasynda mal sharýashylyǵy ónimin óndirý 1,9%-ke artyq. Alaıda, astyq túsiminiń 32,8%-ǵa tómendegeni baıqalady. Bul byltyrǵy qurǵaqshylyq jaǵdaıyna baılanysty»,- dedi G.Musaǵazına.
Oblys ákimi Arhımed Muhambetov kórsetkishterdiń jaqsy ekenin aıtyp, osy qarqyndy túsirmeýdi tapsyrdy.
«Jalpy jyldy jaman aıaqtaǵan joqpyz. Biraq, jekeleı salalarda kemshin tustarymyz bar. 2020 jyly qala jáne aýdan ákimderi ekonomıkalyq belsendiliktiń ósýine qoldaý kórsetip, memlekettik baǵdarlamalar sheńberinde naqty sharalardy qabyldaýy qajet. Ásirese, ońtústik óńirlerdiń ákimderi muny qaperge alsyn.
