Qostanaı oblysynda kún jáne jel energııalaryn qalaı qoldanady
QOSTANAI.QazAqparat - Qostanaı oblysynda EXPO-2017 Halyqaralyq mamandandyrylǵan kórmesinde usynylǵan jobalardyń birqatary tıimdi júzege asyrylýda. Bul týraly búgin oblys ákimdigi apparatynda ótken apparattyq jınalys barysynda oblys ákiminiń orynbasary Meıirjan Myrzalıev málim etti, dep habarlaıdy QazAqparat tilshisi.
Oblysta 1,3 mlrd teńgeden astam somaǵa 13 joba iriktelip alyndy, olardyń altaýy iske asyrylsa, 7 jobaǵa baılanysty tıisti jumystar atqarylyp jatyr.
«Júzege asyrylǵan alty joba Taranov aýdanynda energııa únemdeıtin jylý jabdyqtary, Qostanaıdaǵy Bolotov jel rotorlyq týrbınasy, Lısakov qalasyndaǵy kún akkýmýlıatorlary. Sondaı-aq, Naýryzym aýdanynda saıabaqty jaryqtandyratyn jel-kún elektr stansasy, Áýlıekól aýdanyndaǵy kún sýjylytqyshtary jáne Denısov aýdanyndaǵy gıbrıdti jel elektr stansasy bar. Ol 2018 jyldyń mamyrynda ornatylǵan. Elektr energııasyn únemdeý jylyna 110 myń teńgeni quraıdy», - dep habarlady oblys ákiminiń orynbasary.
Qazir 7 joba júzege asyrylyp jatyr. Olardyń biri - Qostanaıda JAC elektromobılderiniń óndirisi.
«Tórtinshi jáne besinshi jobalar - Lısakov pen Arqalyqtaǵy energııa jáne gaz óndirisi. Bul joba sátti júzege asyrylsa, «Lısakovskgorkommýnenergo» uıymy aıyna 3,3 mln teńge gazdy únemdemek. Altynshy joba - Qamysty aýdanyndaǵy qýattylyǵy 3 kVt quraıtyn jel-kún elektr stansalary. Ol 2018 jyly jeltoqsanǵa deıin ornatylmaq. Jetinshi joba - Qostanaı aýdanynda jaǵajaıdyń boıyna «SMART oryndyqtar» ornatý», - dedi M. Myrzalıev.
