Qostanaı oblysynda qudyqqa qulaǵan balany qutqarý operatsııasy júrgizildi

QOSTANAI. QazAqparat – Qostanaı oblysynda 2 jasar bala 8 metr tereńdiktegi qudyqqa qulap ketti. Bul týraly QR Tótenshe jaǵdaılar mınıstrliginiń resmı ókili Talǵat Ýálı málim etti, dep habarlaıdy QazAqparat.

«10 tamyz kúni saǵat 17: 25-te Qostanaı oblysy Sadchıkovka aýylynda jeke sektorlardyń birinde tereńdigi 8 metrlik qudyq uńǵymasyna 2 jasar bala qulap ketti.

Bala 3,5 metr tereńdikte keptelip qalǵan. Oqıǵa ornyna dereý jetken qutqarýshylar sábıdiń tynys alyp jatqandyǵyna kóz jetkizgen. Olar jedel túrde shuńqyrǵa ottegi jiberip, balany shyǵaryp alý maqsatynda uńǵymanyń janynan taǵy shuńqyr qazdy.

Qutqarýshylar qoly ǵana kórinip turǵan balany arqannyń kómegimen shyǵaryp aldy. Aýqymdy qutqarý operatsııasyna 9 qutqarýshy men 2 tehnıka jumyldyryldy. Kómekke jergilikti aýyl turǵyndary da keldi. Balany qutqarý jumystary saǵat 19:20-da aıaqtaldy», - dedi T.Ýálı.

TJM ata-analarǵa balalardy qaraýsyz qaldyrmaýdy eskertedi. Tótenshe jaǵdaı týyndaǵan kezde «112» nemese «101» nómirine qońyraý shalý kerek.