Qostanaı oblysynda koronavırýsqa qarsy revaktsınalaý bastaldy

QOSTANAI. QazAqparat – Kelesi aptadan bastap Qostanaı oblysynda koronavırýs ınfektsııasyna qarsy revaktsınalaý bastalady. Bul týraly brıfıngte oblystyń densaýlyq saqtaý basqarmasy jetekshisiniń orynbasary Anjela Beksultanova málimdedi, dep habarlaıdy QazAqparat tilshisi.

«22 qarashadan bastap oblysta koronavırýs ınfektsııasyna qarsy halyqty revaktsınalaý bastalady. Revaktsınalaýdan qaı top ókilderiniń ótetini anyqtaldy. Medıtsınalyq qyzmetkerler, pedagogtar, áleýetti qurylymdar qyzmetkerleri, medıtsınalyq-áleýmettik mekemelerdiń ujymy, 60 jastan asqandar, ımmýnıteti álsiz jáne koronavırýs antıdenesi joq adamdar revaktsınalaýdan ótedi», - dedi A. Beksultanova.

Onyń aıtýynsha, revaktsınalaý buryn salynbaǵan vaktsına túrimen júredi.

Sonymen qatar oblysta balalar men 12-18 jas aralyǵyndaǵy jasóspirimderge, merzimi 16 aptadan asqan aıaǵy aýyr áıelderge, bosanǵannan keıin 42 kún ótkennen keıin bala emizetin analarǵa ekpe salýǵa daıyndyq jasalyp jatyr.

«Atalǵan toptardaǵy 666 690 adamdy vaktsınalaý úshin oblysqa «Komırnatı» (Pfizer) vaktsınasynyń 133 380 dozasy jetkiziledi. Sonymen qatar oblysqa vaktsınany mınýs 40-tan -80 gradýsqa deıin temperatýrada saqtaýǵa múmkindik beretin eki muzdatqysh qurylǵy jetkizildi. Osy aıdyń aıaǵyna deıin olardyń qatary taǵy eki qurylǵymen tolyǵady», - dedi oblystyq vedomstvo jetekshisiniń orynbasary.

Vaktsınany emhana men bilim nysanyndaǵy medıtsınalyq pýnktte alýǵa bolady. Balalar men 12-18 jas aralyǵyndaǵy jasóspirimge vaktsına tek ata-anasynyń jazbasha kelisimimen ǵana salynady. Óńirde qazirgi kúni 336 318 adam vaktsına alǵan, bul ekpe alýǵa ruqsat etilgenderdiń 66,6%-y. Olardyń ishinde ekinshi komponetti saldyrǵandar sany – 313 642 nemese 62,1%.