Qostanaı oblysynda koronavırýs juqtyrǵan adam qalalyq aýrýhanada emdelip jatqan
QOSTANAI. QazAqparat – Búgin saǵat 09:50-degi jaǵdaı boıynsha Qostanaı oblysynda koronavırýs juqtyrǵan 1 adam anyqtaldy, dep habarlaıdy QazAqparat.
Tótenshe jaǵdaı rejımin qamtamasyz etý jónindegi Memlekettik komıssııanyń Jedel shtabynyń aqparatynsha, vırýs juqtyrǵan 1 adam 1965 jyly týǵan er azamat. Ol qalalyq aýrýhanada naýqastardy profılaktıkalyq zertteý kezinde anyqtaldy. Er adam túrli ilespeli aýrýlarmen proktologııa bóliminde emdelip jatqan.
Qazirgi tańda barlyq epıdemııaǵa qarsy sharalar oryndalyp, naýqas azamatpen baılanysta bolǵan adamdarǵa qatysty karantın sharalary qabyldandy.
Naýqas jer úıde turǵan, jumys istemeıdi. Aýrý oshaqtarynda zararsyzdandyrý jumystary júrgizildi. Ol Rýdnyı qalalyq aýrýhanasynyń juqpaly aýrýlar bólimine aýystyrylady.
Qostanaı oblysynda qazirgi tańda COVID-19 koronavırýs ınfektsııasyn juqtyrǵany naqtylanǵan 36 adam bar. Aýrýynan aıyǵyp ketkender ázirge 1 adam ǵana.
