Qostanaı oblysynda kópsalaly aýrýhana salynady
QOSTANAI. QazAqparat – Oblys ákimi Arhımed Muhambetov Qostanaı qalasynyń Qonaı shaǵyn aýdanynda zamanaýı kópbeıindi aýrýhananyń qurylysy boıynsha keńes ótkizdi, dep habarlaıdy QazAqparat oblys ákiminiń baspasóz qyzmetine silteme jasap.
Úkimette 2020-2025 jyldarǵa arnalǵan densaýlyq saqtaýdy damytýdyń memlekettik baǵdarlamasy aıasynda respýblıkadaǵy aýrýhana ınfraqurylymyn jańǵyrtý josparlanǵan.
QR Densaýlyq saqtaý mınıstrliginiń málimetinshe, elimizdegi eskirgen 40 nysannyń ornyna halyqaralyq deńgeıdegi kópbeıindi 16 aýrýhana salynady. Solardyń biri – Qostanaı oblysynda.
«Jańa aýrýhana densaýlyq saqtaýdyń talaptary men standarttaryna sáıkes zamanaýı qurylǵylarmen jabdyqtalady. Medıtsınalyq uıym kardıohırýrgııa, neırohırýrgııa, terapevtik jáne hırýrgııalyq kómektiń barlyq beıinderin, qala turǵyndary úshin shuǵyl medıtsınalyq kómek kórsetýdi qamtıdy. Aýrýhanany zamanaýı dıagnostıkalyq qurylǵylarmen jabdyqtaý josparlanyp otyr. Endoskopııalyq, sáýlelik, zerthanalyq jáne ızotoptyq dıagnostıkany júrgizetin bolamyz. Jobany iske asyrý Qostanaı qalasynyń turǵyndaryna sapaly jáne ýaqytyly medıtsınalyq kómek alýǵa múmkindik beredi», - dedi oblys basshysy jıyn barysynda.
Kópsalaly aýrýhana shamamen tórt júz adamdy qabyldaýǵa qaýqarly. Arhımed Muhambetov jaýapty memlekettik organdarǵa osy jobany júzege asyrý boıynsha keshendi sharalar qabyldaýdy tapsyrdy.
