Qostanaı oblysynda kópqabatty úıde gaz ballony jaryldy
QOSTANAI. QazAqparat – Qostanaı oblysynyń Áýlıekól aýdanyndaǵy turǵyn úılerdiń birinde gaz ballony jarylyp, eki adamdy kúıik shaldy, dep habarlaıdy QazAqparat.
Oblystyq Tótenshe jaǵdaılar departamenti baspasóz qyzmetiniń málimetinshe, oqıǵa 22 tamyz kúni saǵat 19:00 shamasynda Qusmuryn aýylynda bolǵan.
«4 qabatty turǵyn úı ishinde gaz ballony jaryldy. Saldarynan 1981 jáne 2002 jyly týǵan jumysshylardy termıkalyq kúıik shaldy. Mamandar olardyń úı ishinde montaj jumystaryn júrgizip jatqanyn anyqtady. Oqıǵanyń aldyn ala sebebi — gaz ballonynyń redýktorynan gazdyń shyǵýy», - delingen aqparatta.
Qostanaı oblysynyń TJD mamandary turǵyndardy qarapaıym qaýipsizdik erejelerin saqtaýǵa shaqyrady. Máselen, gaz ballondary men gaz jabdyqtaryn sertıfıkaty bar mamandandyrylǵan uıymdardan ǵana satyp alý qajet. Gaz ballonyn satyp alarda muqııat teksergen abzal.
