Qostanaı oblysynda kópbeıindi aýrýhana salynady

QOSTANAI. QazAqparat – Kelesi jyly Qostanaı qalasynda kópbeıindi aýrýhana boı kóteredi. Bul týraly medıtsına qyzmetkerlerimen kezdesken oblys ákimi Arhımed Muhambetov aıtty, dep habarlaıdy QazAqparat.

2021 jyly Qostanaı oblysynyń Densaýlyq saqtaý salasyn jańǵyrtýǵa, atap aıtqanda, materıaldyq-tehnıkalyq bazany jaqsartýǵa 6 mlrd teńge bólindi. Onyń 2,1 mlrd teńgesi aýdandyq aýrýhanalardy jaraqtandyrýǵa jumsalady.

«Qostanaı oblystyq aýrýhanasy, oblystyq balalar aýrýhanasy, Qarabaeva atyndaǵy sanatorıı tolyǵymen jańartylady. Densaýlyq saqtaý nysandaryn jóndeýge qosymsha 2,5 mlrd teńge baǵyttaý josparlanýda. Infraqurylymdy jaqsartý maqsatynda kelesi jyly Qostanaı qalasynda kópbeıindi aýrýhananyń qurylysy bastalady. Densaýlyq saqtaý salasyn qoldaý boıynsha jumystar jalǵasady», - dedi aımaq ákimi.

Qostanaı oblysynda aýrýhanalar men emhanalardy kúrdeli jáne aǵymdaǵy jóndeýden ótkizý úshin 3,9 mlrd teńge jumsalǵan. Sondaı-aq, Rýdnyı qalalyq aýrýhanasyna MRT apparaty, oblystyq, ınfektsııalyq, Rýdnyı jáne Arqalyq aýrýhanalaryna 4 kompıýterlik tomograf, 17 sandyq rentgen apparaty, 111 sanıtarlyq avtokólik satyp alyndy.

Arhımed Muhambetov óńirde dárigerlerdi qoldaý jumystaryn jalǵastyrýǵa ýáde etti.

«Medıtsına qyzmetkeri kásibiniń bedelin odan ári arttyrý úshin dárigerlerdiń jalaqysy 30%-ǵa, orta medıtsınalyq personaldyń jalaqysy 20%-ǵa artady. Bul – Memleket basshysynyń tapsyrmasy. Atqarýshy bılik dárgerlerdi qoldaý sharalaryn jalǵastyrady. Aýdan-qala ákimderine jekeleı tapsyrma berildi. Medıtsına mamandaryn qoldaýǵa qosymsha 245 mln teńge baǵyttalady, bul osy jyldyń deńgeıinen 2 ese kóp», - dedi oblys basshysy.