Qostanaı oblysynda kóp qabatty bes úıdiń qurylysy bastaldy

QOSTANAI.QazAqparat – Qostanaı qalasynyń Qonaı shaǵyn aýdanynda kóp qabatty úıler salynyp jatyr. Turǵyn úıler memlekettik baǵdarlamalardyń qatysýshylaryna ǵana beriledi, dep habarlaıdy QazAqparat Oblystyq qurylys, sáýlet jáne qala qurylysy basqarmasynyń basshysy Berik Tańjaryqovqa silteme jasap.

Qostanaı oblysynda «7-20-25», «Baqytty otbasy» jáne «Shańyraq» nesıelik turǵyn úı baǵdarlamalary qarqyndy iske asyp keledi. 2020 jyldan beri óńirde 344 otbasy jeńildetilgen ıpoteka nesıesine qol jetkizdi. Onyń 70-i – kópbalaly otbasy.

«Búginde bıýdjet qarajaty esebinen Qonaı shaǵyn aýdanynda 5 kópqabatty baspana salynyp jatyr. Mundaǵy jańa páterler azamattarǵa «Shańyraq», «Nurly jer» baǵdarlamasy boıynsha beriledi. Tabysy tómen azamattarǵa turǵyn úı satyp alýǵa arnalǵan nesıelendirý baǵdarlamasy aıasynda «Otbasy bankine» 2,5 mlrd teńge aýdaryldy. Memleket basshysynyń tapsyrmasymen ázirlengen «Shańyraq» baǵdarlamasy jergilikti atqarý organdarynda kezekte turǵan baspanaǵa muqtaj azamattarǵa arnalǵan. Onyń shartyna sáıkes, baǵdarlama qatysýshylarynyń otbasylyq tabysy jan basyna shaqqanda eń tómengi kúnkóris mólsherinen 3 ese artyq bolýy kerek. Jyl basynan beri 238 ótinim maquldandy», - deıdi basqarma basshysy.

«7-20-25» baǵdarlamasy sheńberinde Qostanaı oblysynda 1 500-den astam otbasy baspanaǵa qol jetkizdi. Aıta keteıik, páterge muqtaj azamattardy kezekke qoıý endi jergilikti atqarý organdarynan «Otbasy bankiniń» quzyryna berilmek. Bul degenińiz – azamattarǵa «bir tereze» qaǵıdaty aıasynda qyzmet usynylady.