Qostanaı oblysynda kommýnaldyq kásiporyn kassıri 4 mln. teńgege jýyq qarajatty ıemdengen
ASTANA. QazAqparat - Qostanaı oblysynda kommýnaldyq kásiporyn kassıri 4 mln. teńgege jýyq qarajatty ıemdenip alýda aıyptalyp otyr, dep habarlaıdy Qostanaı oblystyq sotynyń baspasóz qyzmetinen.
Qostanaı aýdandyq sotyna QR QK 189-baby 2-bóligi 3-tarmaǵy boıynsha (senip tapsyrylǵan bóten múlikti ıemdenip alý nemese talan-tarajǵa salý) aıyptalyp otyrǵan 42 jastaǵy azamatsha F-ǵa qatysty qylmystyq is tústi.
Aıyptalýshy «Qostanaı aýdany ákimdiginiń turǵyn úı kommýnaldyq sharýashylyǵy, jolaýshylar kóligi jáne avtomobıl joldary bólimi» MM-ne qarasty «Zatobol jylý-energııa kompanııasy» KMK-da kassır bolyp jumys istegen.
Іs materıaldary boıynsha, «Qostanaı aýdany ákimdiginiń turǵyn úı kommýnaldyq sharýashylyǵy, jolaýshylar kóligi jáne avtomobıl joldary bólimi» MM-ne qarasty «Zatobol jylý-energııa kompanııasy» KMK-da kassır bolyp jumys istegen F. óz laýazymyn paıdalanyp 2016 jyldyń aqpanynda 921 000 teńgeni ıemdengen. Bul qarajatty ol óz otbasyna qajetti zattarǵa jáne jubaıyna dári-dármek alýǵa jumsaǵan.
Sáýirde taǵy da 950 000 teńge qymqyrǵan kassır ol aqshany úıdi zańdastyrýǵa ketken shyǵyndy jáne qurlys saldarynan qordalanǵan qaryzdaryn óteýge jumsaǵan.
Keıin, maýsym aıynda F. kassadan taǵy da 940 000 teńge alyp otbasy múshelerin emdetýge, tamyzda 970 000 teńge ıemdenip ony balalarynyń bilim alýyna shyǵyndaǵan.
Azamatsha F-nyń zańsyz áreketi saldarynan kommýnaldyq kásiporynǵa 3 mln. 781 myń teńge materıaldyq zalal kelgen.
Іs boıynsha basty sot otyrysy 30 qańtarda saǵat 10.00-de bolady.
