Qostanaı oblysynda qoǵamdyq tártip qalpyna keldi – Polıtsııa departamentiniń basshysy

QOSTANAI. QazAqparat – Qostanaı oblysy Polıtsııa departamentiniń basshysy Beket Aımaǵambetov jýrnlalısterge arnalǵan brıfıngide Qostanaı oblysyndaǵy ahýal týraly málimet berdi, dep habarlaıdy QazAqparat tilshisi.

Keıingi táýlikter ishinde Qostanaı oblysynda qoǵamdyq tártip qalpyna keltirildi. Bul ýaqyt ishinde polıtsııa qyzmetkerleri óńirdegi ahýaldy turaqsyzdandyrýǵa talpynǵan toptasqan adamdardyń zańǵa qaıshy áreketteriniń jolyn kesti.

«Dál qazir oblysta turaqty jaǵdaı saqtalýda. Qoǵamdyq tártip 6 qańtarǵa qaraǵan túnde qalpyna keltirildi. Toptasqan adamdardyń zańǵa qaıshy áreketteriniń saldarynan bir polıtsııa qyzmetkeri zardap shekti. Oqıǵa ornyn qaraý kezinde janǵysh suıyqtyq quıylǵan qutylar tárkilendi. Onyń ústine bir azamattan travmatıkalyq tapansha tárkilendi», - dep málim etti Beket Aımaǵambetov.

Qazir oblysta tótenshe jaǵdaı jarııalanǵan, qoǵamdyq tártip kúzeti kúsheıtilgen. Qoǵamdyq tártipti buzǵany úshin polıtsııa bólimshelerine 245 adam jetkizildi. Onyń ishinde 35 adam birden bosatyldy. Bosatylǵandardyń arasynda kámeletke tolmaǵandar men áıelder bar. Qazirgi tańda zańǵa qaıshy áreketterdi qujatqa qattaý jumystary júrip jatyr.

Oblystyń komendatýrasy óńir turǵyndaryn sabyr saqtap, arandatqan úndeýlerge ermeýge, tótenshe jaǵdaı kezeńinde qabyldanyp jatqan sharalarǵa túsinistikpen qaraýǵa shaqyrady.