Qostanaı oblysynda qoǵamdyq kólikterdiń jumysy ýaqytsha toqtatylady

QOSTANAI.QazAqparat – Qostanaı oblysynda aldaǵy demalys kúnderi qoǵamdyq kólikter júrmeıdi. Bul týraly oblys ákimi Arhımed Muhambetov áleýmettik jelide jazdy, dep habarlaıdy QazAqparat.

Arhımed Muhambetov búgin koronavırýstyq ınfektsııanyń taralýyna jol bermeý boıynsha jedel shtabtyń kezekti otyrysyn ótkizdi. Jıynda monıtorıngtik toptardyń jumysy qarastyryldy. Qazir óńirde vedomstvoaralyq komıssııanyń tapsyrmasyna sáıkes monıtorıngtik toptardyń jumysy kúsheıtilgen.

«Qazirgi ýaqytta 860 reıd júrgizilip, 4757 nysan tekserildi, onyń barysynda 825 zańbuzýshylyq anyqtalyp, materıaldar ákimshilik sharalar qabyldaý úshin sanepıdbaqylaý organdaryna joldandy.

Engizilgen shekteýlerge qaramastan, oblys turǵyndary áli de jappaı otbasylyq is-sharalar ótkizýde, al bıznes ókilderi sanıtarlyq normalardy buzyp keledi. Sondyqtan karantın talaptaryn buzǵandardy mindetti túrde beınejazbaǵa túsirip, monıtorıngtik toptardyń jumysyn kúsheıtýdi tapsyrdym.Azamattardy KVI taralýyna jol bermeý boıynsha barlyq usynylǵan sharalardy saqtaýǵa shaqyramyn», dep jazdy Arhımed Muhambetov Instagram paraqshasynda.

Sondaı-aq, aldaǵy demalys kúnderi oblysta qosymsha shekteýler qabyldanady. Atap aıtqanda, qoǵamdyq kólik jumys istemeıdi jáne aýdany 2000 sharshy metrden asatyn azyq-túlik emes saýda obektileriniń jumysyna ýaqytsha tyıym salyndy. Buǵan deıin jumys istep kelgen avtomobılder men aýyl sharýashylyǵy tehnıkalarynyń qosalqy bólshekterin satatyn dúkender de jumysyn toqtatady. Sondaı-aq monshalar men saýnalardyń jumysy shektelip, qoǵamdyq tamaqtaný obektileri tek alyp ketý jáne jetkizý úshin jumys isteıdi.