Qostanaı oblysynda qoǵamdyq kólik jolaqysyn tóleýdiń jańa tarıfi engiziledi

QOSTANAI.QazAqparat — Osy jyldyń 9 aqpanynan bastap óńirde qoǵamdyq kólikke aqy tóleýdiń jańa júıesi engiziledi. Bul týraly óńirlik kommýnıkatsııalar qyzmetinde ótken brıfıngide Qostanaı qalasy ákimdiginiń turǵyn úı sharýashylyǵy bólimi mamandary málim etti, dep habarlaıdy QazAqparat tilshisi.

Baǵdar avtobýsy jolaqysynyń dıfferentsııalanǵan jańa tarıfi qoldanysqa enedi. Buǵan deıin qoǵam belsendileri arasynda talqylanǵan máselege núkte qoıyldy. Qostanaı qalasy TÚKSh bóliminiń basshysy Naýryzbaı Mýsın aıtqandaı, qoǵamdyq kólikterde jolaqy elektrondy túrde qabyldanady.

«Jol aqysyn qolma-qol tóleý quny burynǵydaı 80 teńge emes, 150 teńge bolady. Bul jolaýshylardy tolyǵymen karta arqyly tóleý júıesine kóshirý úshin jasalyp otyr. Jol qunyn elektrondy tóleý úshin «Alem Pay» kompanııasynyń arnaıy kartasy nemese kez kelgen bank kartasy kerek»,- dedi ol.

Qazir oblys ortalyǵynda oqýshylar men zeınetkerler tolyqtaı kólik kartasymen qamtylmaǵan. Sondyqtan olar 1 sáýirge deıin jol aqysyn qolma-qol tóleıdi. 7 men 15 jas aralyǵyndaǵy oqýshylar úshin jol quny 40, zeınetkerler úshin 70 teńge bodyp bekitildi.

«Qostanaı qalasynda qazirge deıin 31 myń tólem kartasy satylyp, onyń tek 13 myńy ǵana iske qosylǵan. Demek basym bóligi paıdalanylmaı keledi. Qostanaıǵa qosymsha 10 myń avtobýs kartasy ákelindi. Búginde olar barlyq iri saýda ortalyqtarynda quny 290 teńgeden satylyp jatyr», - dedi N.Mýsın.