Qostanaı oblysynda kıik atqan brakonerler ustaldy
QOSTANAI. QazAqparat – Jangeldın aýdanyndaǵy reıd kezinde polıtsııa brakonerlerdi ustady, dep habarlaıdy QazAqparat.
«38 jastaǵy aýdan turǵyny Baıtursyn aýylynan 15 shaqyrym jerdegi Qarasor ózeni mańynda ustaldy. Tekserý kezinde quqyq qorǵaý organdarynyń ókilderi kıiktiń terisin, ańshy qarýlaryn, 12 kalıbrdiń 2 patronyn taýyp, tárkiledi»,- deıdi polıtsııanyń baspasóz qyzmetindegiler.
Qazir atalǵan fakti boıynsha QR QK 339-babymen (Sırek kezdesetin jáne quryp ketý qaýpi tóngen, sondaı-aq paıdalanýǵa tyıym salynǵan ósimdikter men janýarlar túrlerimen, olardyń bólikterimen nemese derıvattarymen zańsyz aınalysý) sotqa deıingi tergeý bastaldy.
Qostanaı oblysynyń polıtsııa departamenti tabıǵatty qorǵaý polıtsııasy bóliminiń bastyǵy Talǵat Ahmetovtiń aıtýynsha, qazirgi ýaqytta óńirde qajetti tehnıkamen jabdyqtalǵan mobıldi toptar qurylyp, jumys isteýde. Olar aqbókenniń betpaqdala popýlıatsııasyn mekendeıtin óńirin de patrýldeıdi.
