Qostanaı oblysynda Keıki batyr mavzoleıiniń qurylysy aıaqtalyp qaldy
ASTANA. QazAqparat - 1916 jylǵy ult-azattyq qozǵalys batyry Keıki batyrdyń súıegi mavzoleıde saqtalady. Qostanaıda onyń qurylysy aıaqtalyp qaldy. Bul týraly Ortalyq kommýnıkatsııalar qyzmetinde oblystyq mádenıet basqarmasynyń basshysy Erlan Qalmaqov habarlady.
Torǵaı jerinde qazir jazýshy, pedagog-aǵartýshy Ybyraı Altynsarınniń mavzoleıin jóndeý jumystary aıaqtalýǵa jaqyn.
«1992 jyly salynǵan mavzoleıdi kúrdeli jóndeýden ótkizýge oblys ákimi bıýdjetten 80 mıllıon teńge bóldi. Bul eki mavzoleı Qazaqstannyń respýblıkalyq mańyzy bar sakraldyq nysandar tizbesine usynyldy», - dedi spıker.
Osy jylǵy qyrkúıekte belgili qolbasshy, dıplomat, Abylaı hannyń senimdi maıdandasy Shaqshaq Jánibekke arnalǵan eskertkish ashylady dep kútilýde.
«Ol eki el arasyndaǵy ózara is-qımylǵa kúsh salǵany úshin Reseı ımperııasynan tarhan ataǵyn alǵan birinshi adam. Sanaýly kúnderden keıin áýejaıda Qostanaı qonaqtary batyrdyń eskertkishin tamashalaıdy», - dedi spıker.
Erlan Qalmaqov ár halyqtyń, órkenıettiń kıeli oryndary, máńgilik batyrlary bolatynyn atap ótti.
Prezıdent Nursultan Nazarbaevtyń «Bolashaqqa kózqaras: qoǵamdyq sanany jańǵyrtý» maqalasy tarıhı murany saqtaýǵa baǵyttaldy. «Ulttyq birtektiliktiń tiregi sanalatyn eskertkishter men tarıhı oryndaryn jańǵyrtý, qaıta jóndeý jumystary Qazaqstannyń sakraldyq geografııasy jobasyn uıymdastyrý aıasynda jalǵasa bermek», - dep sózin túıindedi spıker.
