Qostanaı oblysynda kásipkerlerdiń biryńǵaı bazasy qurylady
QOSTANAI. QazAqparat - Qostanaı oblysynyń kásipkerler palatasy óńirlik keńesiniń keńeıtilgen otyrysyn ótkizdi. Jıynda aldaǵy jylǵa josparlar bekitildi, dep habarlaıdy QazAqparat.
Qostanaı oblysy kásipkerler palatasynyń dırektory Murat Ábenovtiń aıtýynsha, óńirlik palata qurylǵaly kásipkerlerden 1000-ǵa jýyq ótinish kelip túsken. Palata zańgerleri 6,7 mlrd teńgeden astam qarjy únemdegen. Munyń bári bızneske baǵyttaldy. Mysaly, jaqynda Jitiqara qalasynyń kásipkerine sot arqyly 14 mln teńge aqshasy qaıtaryldy. Taǵy bir kásipker jylyna 20 mln teńgeden astam soma salyqty qosymsha tólep kelgen. Bul zańsyzdyq ta palata zańgerleriniń qatysýymen retteldi. Aıta keteıik, qazir bıýdjet qarajaty esebinen nysandardy salý kezinde jergilikti monıtorıngke basty nazar aýdarylady
«Keshendi máseleler de retimen sheshilip keledi. 2014 jyldan bastap, kásipkerler palatasynyń jalpy tizilimine 41 júıelik másele engizilse, búginde onyń 26-sy sheshimin tapty. Osy jumystyń sheńberinde memlekettik qyzmetterdi alý kezinde qujattardy mindetti túrde notarıaldyq kýálandyrý talaby joıyldy. Endi tıisti qujattardy HQKO mamandarynan alýǵa bolady. Qujatty rásimdeý boıynsha, aımaqtaǵy 137 kásiporynnyń jumysy bir júıege keltirildi. Degenmen kásipte problemalar da bar. Atap aıtqanda, aınalym qarajaty men shıkizattyń jetispeýi, taýardy ótkizý-qabyldaýdaǵy máseleler áli tolyǵymen rettelmedi. Sol úshin Qostanaı oblysynda kásipkerlerdiń biryńǵaı bazasy qurylady», - dedi Murat Ábenov.
Óńirlik palata basshysy aıtqandaı, bıznes múmkindikterin jappaı paıdalanýdy qamtamasyz etý úshin qalalar men aýdan ortalyqtarynda qurylǵan kásipkerlerge qyzmet kórsetetin barlyq ortalyqtardyń jumysy tsıfrlandyrylady. Búginde barlyq bıznes sýbektilerin elektrondyq júıege kóshirýge asa mán berilip otyr.
«AAtameken.Academy sertıfıkattaý baǵdarlamasy osy júıege negizdelgen. Qostanaı oblysynda bul tuǵyrnamalyq baǵdarlama pılottyq rejımde iske qosyldy. Endi kásipkerlerge «ST-KZ» nysanyndaǵy ishki aınalymǵa shyǵý sertıfıkattaryn úıden nemese keńseden shyqpaı-aq alýǵa bolady. Barlyq qujattarǵa ótinishti onlaın rejıminde berýge bolady. Avtomattandyrý bızneske qarjylyq emes qoldaý kórsetýge bólinetin bıýdjetti qysqartýǵa, qamtý bóligin ulǵaıtýǵa, qujattar aınalymyn tómendetýge, konsýltanttar sanyn ońtaılandyrýǵa múmkindik beredi.
Jıynda aıtylǵandaı, oblysta QR normatıvtik-quqyqtyq aktilerine tıisti ózgerister engizý boıynsha jumystar bastaldy. Nátıjesinde, taýardyń naryqqa shyǵýyn sertıfıkattaýda elektrondyq qujat aınalymy paıdalanylady.
Budan ózge, bıznes úshin ashyq tsıfrlyq platformany qurý boıynsha jumystar júrgizilip jatyr, onda basqarýshylyq sheshimderdi qabyldaýdy jeńildetý jáne ishki protsesterdi avtomattandyrý úshin qajetti servısterdi ornalastyrý josparlanǵan. Olardyń ishinde kassalyq jáne býhgalterlik esep júrgizý, personaldy basqarý, taýarlar men qyzmetter qozǵalysyn baqylaý, resýrstardy shyǵyndaý monıtorıngi, elektrondy qujattar aınalymy bar.
