Qostanaı oblysynda qarttar úıi órtenip jatyr

QOSTANAI. QazAqparat – Búgin tańerteń Qarabalyq aýdanyndaǵy Qarttar jáne múgedekter úıinde órt bastaldy. Qostanaı oblysynyń tótenshe jaǵdaılar departamenti oqıǵaǵa qatysty túsinikteme berdi, dep habarlaıdy QazAqparat.

Qarabalyq aýdandyq basylymynyń habarlaýynsha, qarttar jáne múgedekter úıiniń turǵyndary mektep janyndaǵy «Jas talap» ınternatynda ornalastyrylyp jatyr.

Al erekshe kútimge muqtaj adamdar aýdandyq aýrýhanaǵa jatqyzyldy.

Órt týraly tańǵy 7:30-da habar keldi. Órt sóndirýshiler oqıǵa ornyna kelip jetkende ǵımarattyń shatyry qatty janyp jatqan.

«Qarabalyq aýdandyq Qarttar jáne múgedekter úıinen 51 adam evakýatsııalandy. Bul – oblysymyzdyń múgedektigi bar 13 adam men 38 qarııa», - dep baıandady oblystyq TJD bastyǵy Birjan Kárimov.

Órtten zardap shekkender joq. Onyń shyǵý sebepteri ázirge belgisiz.

Órt sóndirýshiler oqıǵa ornynda áli jumys istep jatyr.