Qostanaı oblysynda kartop pen sábizdi satyp alýǵa shekteý engizildi
Alaıda, arzan kókónis bir adamǵa eki keliden artyq berilmeıdi. Áleýmettik dúkender jelisi osyndaı shekteý qoıyp otyr. Osylaısha, jergilikti bılik baǵany negizsiz ósiretin alyp-satarlardyń jolyn kesýge yntaly.
Áleýmettik saýda oryndarynda sábiz bazardaǵy baǵadan tórt esege, al kartop eki esege arzan. Mundaı baǵany qalalyq ákimdik bekitken. Biraq alyp-satarlardyń kinásinen arzan kókónis tez taýsylyp, sóreler jıi bos qalady.
«Kartop pen sábizdi osy jerden satyp alyp, syrtta 3 ese qymbat baǵaǵa satyp júrgender bar. Mundaı alyp-satarlardyń jolyn kesý múmkin emes. Tek saýda oryndaryna áleýmettik mańyzy bar taýarlardy satýǵa shekteý qoıý týraly usynys jasadyq. Sonda azyq-túlikten tapshylyq týyndamaı, bárine de az-azdap bolsa da jetetin shyǵar dep oılaımyz», - dedi qalalyq kásipkerlik bóliminiń basshysy Ilona Tımoshenko.
Kartop pen sábizdi arzandatý úshin saýda oryndary men «Tobyl» áleýmettik-kásipkerlik korporatsııasy arasynda kelisimshart jasalǵan. Osynyń nátıjesinde dúkender jeńildetilgen nesıege qol jetkizip otyr. Endi bılik úsh aıǵa bekitken baǵany ustap turýy shart.
«Biz áleýmettik mańyzy azyq-túlik taýarynyń 16 túrin qamtamasyz etemiz. Bireýinen azdap paıda tapsaq, endi birinen shyǵynǵa batýǵa májbúrmiz. Ótken aıda shyǵynymyz 8 mln teńgege jetti. Amal joq. Bizge qoıylǵan shart osyndaı. Sábizdi 550 teńgeden alyp, 157 teńgeden satyp jatyrmyz. Keıbireýler arbany toltyryp tıep alyp ketedi. Sondyqtan bir adamǵa eki keliden artyq satpaıtyn boldyq», - dedi saýda jelisiniń ákimshisi Botagóz Kóshembaeva.
Qazir oblystyń turaqtandyrý qorynda 300 mıllıon teńgege baǵalanǵan azyq-túliktiń 12 túri bar. Óz kezeginde kókónis baǵasy jaqyn kúnderi turaqtalady dep otyr bılik. Buǵan qosa, aımaqqa elimizdiń ońtústik óńirinen kúndelikti 200 tonna kókónis jetkiziledi.
